Ariana Grande-i Buzz Aldrin indang kensep ka zülutsü

Tsüklai/February 09 (Agencies): Taoba America nunger astronaut Buzz Aldrin-i nüngtugu kentener Ariana Grande den Twitter nung sensaksemba sülen Ariana-i Buzz Aldrin indang kensep ka yanglutsütsü atema nangzükogo.
Arishi küm 89 tain Buzz-i Ariana dang pa taküm indang ken ka zültsütsü atema asüngdangba sülen küm 25 tain Ariana-i mulunga liasü. Buzz shiba Neil Armstrong den külemi ita nung mezüng tetsüng ajemoker rongnung ka liasü, pa nüngtem nung kensep ka yanglutsütsü atema Ariana-i pelashishia agizük.
”@ArianaGrande, tanep onoki ‘NASA’ ken angaogo aser iba ken ya onoki ngutetba rongnung tasen ka asütsü. Na ‘universe’ ama aser onok ya N-A-S-A,” ta Ariana indang ken tasen ‘NASA’ angaba sülen Twitter ajanga NASA (National Aeronautics and Space Administration)-i lemsatep.
Tawa tanü ka Ariana-i la indang kensep tasenba – ‘Thank U, Next’ saya liasü kong track 12 densema lir. Iba denji külemi Ariana-isa ‘Break Up With Your Girlfriend, I’m Bored’ indang music video sayaogo.
Kasa mapang, tawa Grammy award sentong nung producer temi nokdangba ajanga Ariana-i shilem magitetba indang lai lemsatepa liasü.