Ariana Grande-i Charity Concert ka ayonga akatsü asoshi sentong lir

New York, May 27 (Agencies): Pop kentener Ariana Grande-i Hokolbarnü Manchester-i tanaben arua charity concert ka agütsütsü asoshoi nangzükogo.
Manchester nung lendong atalokba sülen Arishi küm 23 tain kenteneri la kentenba sentongtem thia Florida nung lar kidangi meyipa ao. Lai ashiba agi, Iba kentenba sentong ya Manchester dang temeim sayuba temaitsü ka asütsü.
Lendong nung densemba kibongtem nem teyari agütsütsü asoshi iba kentenba sentong ayongzüka akatsü, ta lai ashi. Ajisaka koba anogo nung akatsüar ajibo tang tashi mejangja.
“Iba amala lendong asoshi asenok telangzübaji; tanga mapang dang nungi tali longjemtsüba, kati ka yaritsüba, temeim sayutsüba aser tali agütsütsüba asütsüla,”ta lai social media balala ajanga ashi.
” Iba tatalokba ajanga asenok tsüngda nung telemdang madokdaktsütsü. Tesempa nem asenok mekokdaktsütsü,” ta laisa ashi.
Grande-i ashiba agi, la kentenba sentong nung nüburtem wadang balala nungi 21,000-capacity Manchester Arena sünga adenshibaji music tashi lir.
“Music ya alima nung alir ajaki lemsateptettsü. Music ya asenok aneptsütsü, longjemdaktsütsü aser peladaktsütsü asoshi lir,” ta lai maneni shisem.