Arishi küm 101, Man Kaur-i 100m asemtep nung takok angu

Auckland, April 25 (Agencies) : World Masters Games nung India tsür arishi küm 101 tain, Man Kaur-i 100 metres asempetba nung takok angu.
Man Kaur ya Chandigarh nungi lir, aser arishi küm 100 ser temapur 100 metres asemteper pa kija liasü. Lai minute ka ser second 14 nung alizüng tonga asem.
La ano Bodhbarnü 200m asemtepba nunga shilem agitsü renema lir aser iba den külemi ano ‘shot put’ aser ‘javelin throw’ asayatem nunga shilem agitsü tenüng agüja lir.
Man Kaur nem lar jabaso, Gurdev Singh-i asemtsü training agütsür aser lai tetoktepba aika nung shilem agia takok bener aruogo. Lar jabaso ya Canada nung alir aser pa-a asemteper ka lir.
Lar jabaso-i ajungmesoba ajanga Man Kaur-i arishi küm 93 asüba mapang nungi asemtepba nung shilem agia arur.
Lai alima tesem balala nung Masters Game tem nung shilem agia arudang medal 20 tashi ngua lir.
“Ozü jabaso-i sayuba ni angar. Ni anogo shia pa den training agir. Ni kü temang anema aser yakyaka liner. Ni masü tashi asemtepba nung shilem agitsü,” ta lai ashiba osangbenertemi metetdaktsü.