Arishi küm 13 tebur chanu ka Nagaland nung samah

Jorhat, June 16 (Agencies) : Upper Assam Sivasagar district kübok Nazira nungi tanur arishi küm 13 tain ka Dimapur, Nagaland nung samaogo. Police-i bushisüngdangtsü tenzükogo ajisüaka tang tashi nung ano iba tanur kong ali, iba indang osang tejangja kecha mongutteter.
Superintendent of Police (Sivasagar) Anand Prakash Tiwari-i, “Arishi küm 12 nungi 14 tsüngda pur parnok tanur asem Nazira toktsür Dimapur nung mapa inyaktsü atema ao. Ajisüaka parnok Dimapur nungji samaogo ta osang angashi. Onoki indangjisa bushisüngdangtsü tenzük aser kanga tia kaa parnok asem rongnung anabo ngutetogo, saka ka ano mongutet lir. Tanga manenei bushisüngdangdar ajisüaka pa kong ali, ibaji mejangjateter,” ta ashi.
Pai, “Onoki Nagaland police tem den angatettepa iba tanur bushidar aser parnokia yamaji nüngdakba ajak nung yaridar. Iba tanur tekaratiba nung ngua kümzüktettsü onok teimla lir,” ta shisem.
Tang tashi mongui alisang tenüngji Bikash Borgohain lir. Bikash ya Simoluguri police station kübok Gargaon nungi lir. Pa Simoluguri nung Class IV züngyaa liasü. Tebu tenüng Bibhash Borgohain aser pa ya shishilemba mapa inyaker.
Nazira jila nungi Biswajit Karmakar June 8, 2016 nü Dimapur nung angu. Pa yangji joko ita asem dak tema liyaa liasü. Biswajit ya Nazira Bahumukhi Higher Secondary School nung zünga liasü aser pa school senshiba mapang memetetba nisung kar arua pa Nagaland-i pua anir ao.
2015 küma Simoluguri tesem nungisa tanur ka sama aser iba tanurji ita ishika sülen Dimapur nung angu.