Arishi küm 5 tanur kati Meghalaya CMRF nem tenla agütsü

Shillong, August 27 (Agencies): August 27, 2019 nü arishi küm 5 tain tanur kati Meghalaya Chief Minister’s Relief Fund nem tenla agütsü.
Iba tanubosang ya L. Mayan Nongbri lir aser pai pa indang piggy bank nung sen bendenba ajunga tzümetsüng agi timtem ajurur yariba nung amshitsü atema tenla agüja liasü.
Mongulbarnep L. Mayan-i pa indang piggy bank bener Meghalaya Chief Minister Conrad K. Sangma’er kidangi ao aser sen ajunga CMRF nem tenla agütsü.
Iba mapa tajung atema Conrad Sangma kanga pela aser pai L. Mayan nem mapang agüja sensaksem, ajung aser pa den külemi noksatem agia liasü.
“Tanep ozü kidangi tesemdanger balaka aru aser paji L. Mayan Nongbri lir liasü” ta Conrad-i Twitter nung metetdaktsü.
“Arishi küm 5 tain Mayan-i pa indang piggy bank bener aru aser pai sen bendenba ajak Chief Minister’s Relief Fund nem tenla agütsü. Pa taochi sayuba aser aria bilemtsüba ajanga kü mulung nung kongshiogo” ta Conrad-i ashi.
“Taochi mapa tila ka dang inyakbajia tongtipang ta iba ajanga asenok nem bilemtetdaktsür. Kanga pelar Mayan aser onok ajaki nü dang nungi angazükdi” ta Meghalaya chief minister-isa ashi.