Arishi küm 68 tain kati tetsür chanu ka taküm raksatsü

Mokokchung, June 13 (TYO): Tebur tain kati kilir Konyak tsür arishi küm 12 tetsür chanu ka tashiyim agi raksatsüba osang ajanga angazüker.
Iba maparen dak sentakba nung tai tonglokja alisangji arishi küm 68 tain Alemchiba police ket nung lir, ta police osang ajanga angazüker.
Tashiyim agi raksatsüla tetsürlaji; class pezü (4) nung azünger aser laji Khensa nunger kibong ka kidang alir, ta osang ajanga jangogo.
Iba osangbeneri Eastern Nagaland People’s Union Mokokchung ketdangpurtem den jembidang parnoki ashiba agi, June 4 anepdang 5:00 ako meta tetsürlaji kibur kidang sorochioka lia Alemchiba-i tashiyim agi mapa tamajung inyak aser ano June 8 nüa nikongdang 1:00 ako meta aremleni anir or kasa tashiyim mapaji inyak. Yamaji ser külen Alemchiba-i tetsürla dangji iba indang ya shinga danga mashitsüla aser ashi nungbo majungtsü, ta amokmerena liasü ta ashir.
Iba tatalokba ya Konyaktsür (KNSK Mokokchung)-temi angashia metpur/aitsüsang (accuse)-ji KNSK salangi jaok saka maru, anungji KNSK-i iba ken o ya Eastern Nagaland Women Organization (Mokokchung) dangi aben. Anungji, iba dak sentakba maparen nung ENWO-i akok tashi lenmang balala ajanga metpurji ENWO salangi anir arutsü merang saka anir marutet aser tesü metpurji police ket liasü, ta ENPUM ketdangpurtemisa tatalokbatem tatongi ashi.
“Iba tatalokba indang ya onok/kinünger dang shingaia kecha mashi aser Khensa Village Council, Khensa Watsü Telen aser metpur kinüngertemi iba keno ya miimbanga ayutsü merang,” ta ENPUM ketdangpurtemi kanga mepelai metetdaktsü. “Iba ama tashiyim agi taküm raksatsüba mapaji kukua aitsür” aser “ochi temeten asoshi tatem tashi noktaktsü”, ta parnokisa metetdaktsü.
Iba dak sentaba maparen nung Ao Senden, Watsü Mungdang, Ao Kaketshir Mungdang (AKM)-i anir lokti ajaki nungita yaridaktsüner, ta ENPUM ketdangpurtemisa ayongzüka ashi.
Police ketdangser kati ashiba agi, tanü nikongdang 1:30 ako shi nung Eastern Nagaland Women Organization (Mkg) aser Eastern Nagaland Students’ Union (Mkg) ketdangpuri anir telok kar Mokokchung PS-I-i aru aser metpur (tai tonglokja alisang)-ji meshi, idangji police o item telok tsüngdaji rongnung tulu adok.
Item telok jagi police station nungji lung agi sashia aon meso, aser tensaji kanga mejungi küma aoba ngua police-i anüng nung injang katokba den zükshia meindokba (lathi-charge asüba) sülen tensaji süngjema aküm, ta police ketdangserisa ashi.
“Aitsüsangji onok ket nung lir aser iba dak sentakba nung bushisüngdang maparen tenzükogo,” ta police ketdangserisa shisem.
Iba maparen dak sentakba nung ENWOM-i sorkar nem takhangba pungu agütsüogo. Parnoki akangba rongnung; aibelensangji temzüng nung aliba ama tapet merenshitsüla, pa nem “tasüba temerenshi” agütsütsüla, paji bail nung mechioktsüla, taküm raksatsüla nemji temenok agütsütsüla, ta itemji densema lir, ta osang ajanga angazüker.