Arishir lajar ka

– S. T. Yapang. Lkr. Kohima.

Tsürapur peria malir aser sensakserang masa mangatet, taküm ali mashi. Adianu peria alir aser takar anepongi saker mapa inyaker, saka iba Lajarsangi anü tokujong tashi adokdang aon tajung den chiyungnüa saker, saka kidang kecha maka. Yasüng menur arua mejangba ajanga chi mechiyung, chisüng tilaka nemshitsüba dang, yamaji sür tangar dang apumesa meshimetsüi aotsü, tanga mapa mashi.
Arogopur aser yimten ajaki sabang nungi pa aitsüa tilutsüaka pai aji kecha shishia bilema mali, pa aitsür aser atakatemer denjia külemi yipa pa bilemba ajak süzüng/shizüng makang tokzüker amai shia amungtsü. Anungji Tsüngrem tenüng atemer ayanger rogo aser yimten nung ayangertem senteper parnok amala Lajamenjar nüngtem nung sorkar aser bendang lima nungi sen aika agizüka agir, par nüburtem taremzükji ulura asünungji aji tebushir mali, kari ibaji putettsüra adianu kinunger ajaki arua nemtemtsü, saka ano talisa tebushirji senpet mokoki ola maka aküm, süsang koya lungnen nung atemset ama sempettsüpet agi atemset.
Yimjak nung iba lajarsang arogo puri mangu amai yutsür. Meshimejungerji yamajisa asür, saka nija ren nungbo kanga anepaluba ngua nibo kangasa süngmang. Tamanger yimya ya kechi ! Arogo nunger sen paika kar, süra kechiba Lajar aser sensaker asoshi teyari lenmang kata melepokteter, mozü mora mesüra parnok tanur kaketreju tajung nung züngdaktsüa iba taa nungji tera yaritep nung koda ! Saka aji mebilemi Arogo nunger ki tajung süteptsü aser talongtsü tajung alitsü, libaliro temesüng nunger jenjang ama merükteta alitsü aji dang, saka tanela merüktettsübo sentong nungji mali.
Yimsüsürtemjia pa yimli nung maongka aginüdang iba amala Lajamenjarji jadena süngujemtsü agütsür pa kümzükdaktsütsü, saka pa jenjang yangerteterbo par lu nung anü tsüka wadang nung rataker inyakdaktsütsü dangashi kenü danga anogo ka sen talila agütsüsemba otsü maka.
Tejashi aser temulung shirangtsü aika liaka oda Teyanglur ka lirji takar sen ma nung mejanger amui moteter, saka iba Lajarsang yabo yimdong, kima, kidang ta mali mashika nung teni konga mejangteter, aji angudang takartem sen ma nung longtaker apayua nükshir. Reprangangjo takartemji oji… sayiptsüa longtaker tekettsü külen jaki yipden nung ajentak aser teka jaki tekolak nung tepiter amui mouteti Lajar ka teni akongba nükshibaji koda! Kechiyong pa amui nanga aobaji tenükshitsüka liasü. Talisa tsüngküm nung sükseta süaka sü mabenia mejangtetbaji koda tesüngmangtsü! Ya akümliri tenükshila nükshir. Ni itemji angudang kü mulung nung ashi, “Aji chiang nenok takartem, nübur sen auyadena yur ki tajung sütepaka, tanüker teperi yur mejangaka, sensaker aser milamitsür ayipjanga mejangbajibo maoyateter südi to! Tang nai Lajar ka teni akongbaji ang nükshir no! Tsüa! Ano nai tatsüka lirbo item sensakertem tangar dang apua itsükontzü aser robuso den nangnanga chiyungbaji apayutsü ako. Parnok kidang itsükontzü den lun tilala tak… tak… ta menaka chiyungba olaji ner kidang shi ango talubusa liaka madokdaktsüteter südi to !”
Tia kar maka tangari tilutsür aser tang chiyungtsü maka meshimetsüi aor, ta asübaji iba Lajarsang mulungsentsü nung mali asünungji nashi tetsüi techanu temeli agi mezük ama kuji kumesü jangnep adoka madema mesü, ashiko pa ku nungji mangatem arua atemtsü merangdang manga aika ajutoka tetsüngteben süteter mozükilen senzür südi, yamaji tangari anguba tejak o tekolak naji tajungtiba agi renemtetaka telunglenbo leper ama arür agi kangbanger kima, yimdong, kinük ajak nung shisa makar karbo puadisü mepuadir ta pai tanemi pio agi kensü tajung ka apushia tetsüngteben paiteper nüka alir. Shibai metet pa dak arürji kari menoktsüra pongalashi tetsürok teküp asar amai kakzüktsüba dang asütsü. Kodang pai shisa makar nübutemji angur, parnok yongrü ka nung külemi artsü asoshi pa meshimetsür ka süaka pa akaba tajungtiba agi angati agütsür, aser pa süboki aitdaktsür. Aya! Koda tesasatsü! Meimchiribo iba Lajarsang denjibo temba meimnütsüka, saka pa sübok talem nungi pila aotsüji tasü maiter aser labi puribo kodanga makoktsü.
Iba Lajarsang ya yimjak nung atalaka, nija ren nungbo sensakseri ang tesapuba ano takar den ang teputepba ta. Ni kanga süngmanga pa asüngdang, “alemli nungi ne indang angashia aru, na yimkümer masü tesülen arur sürnung nai ang yimliji amokbanger aor, yimten yimsüsüri senchi aika chiaka, taküma lalutsüaka nai kecha sasaa mali, Laishiba nunga ne indang shisema lir, nai sensak tia aser alar jenjang nung liaka aremteter, ne dakbo sensaker sentsü tapetba, ano meshimetsüi ora aji ang tazüba, na shiki nung yura tali temoatsüba, telok telok senteper mi nung rungtoka jaksa indokaka, na atalar aser tilutsür aika aliyongbo tanü tashi na yamai perangshisa aliba ya kechi tasa ajanga ?” Pai kecha matitaki langzü, “Nisungtemi ni ajemer, idangji ni par arishi anogoji ajemer. Parnok ni agi meseper, idangji ni par azü meseper, anungji kü arishi teti atsülanga alitsü, ni ano putusa putu alitsü.”
“Nai yamaji inyaker ta asübaji nibo tangang meteter, süra nisungtemia aji metet asü memetet?” “Parnokji yiar matumalem tesa, parnoki kodanga memetettsü.”
“Oda nisungtemji yiar asü nai tasa kar amshia meputetdaktsür?” “Ni putu tensa den apet tasa amshia külakoktsür. Ni sentsüa temesüng nungi temerem, temerem nungi wakong sentsü ta melenshir. Yamaji kü nünga melenshijen melenshir, aji tajungba, tanangba ta akümer. Alemli netsü nebuo nunger tensa kü dang mijemtzü/ piya ta aja, parnoki aji jemer mapa meranga inyakba yong süpong chia aliba den rara nung tsükchir kokteta mangko bener arua konang nüngsang ajangzüka yutsü. Ajisüaka nebu nunger tensa kü dang OLD MONK ta jaa bendanger yimsü jaok, Naia bilemdangang, iba amala tambur/tejen Monk ya ner yimli nung amenok nungji par tesayuba sülen anidaka nübur jenti süngyanglu külemer kümdaktsüogo, ibayongji nenok yimsü amanger dangashi yimsü tesayuba inyakerbo kata mali kümogo. Ner mapang nenoki kü nüng 100 PIPER’S ta melentsü, anogo shia meranga inyakaka tangar memenepba putu ka nung jemji apushia kazü agi kechi ajangzüktsü? Tia tanupur aser peisasa tia majung shimteter rogo jemji apudang aremlen nungi miim per adoka mejisetba to nai mamatoki lir südi? Joko tang lanur putu nung kü nüng TEACHER’S ta melentsüogo, ashiko parnoki niji alima nung tesayur tajungtiba ta jemtet südi, kechiyong ni ya alima nung azümesen, sensakpu aser makamait tia sayur tajungtiba lir. Ano tarutsü nunga kü nüng aser sentsü melenshijen melenshitsü.
Kü temeimbatem, tang kü o angang aser ne mulung lungpak nung ya züluoka yuang. Ni ne bang nung ataloker ne mulungsentsü nung akoshir, ‘Ni jemang ja… Ni jemang jo… Ni ali pela tzüpokdak lir’. Anungji arung temeimbatem kü nem ne mulungsentsü lapokjang aser kü den pelatepa chiajemang, aser nia nenok chia ajemdi.”