Arishirtem ajak dangi (Senior Citizen) 

– R. Lipok Jamir, Aoyimti

Obuo, Otsü; Oba, Oja, Senior Citizen-tem anogo anasai arudang, nenok ajak dangi tetushi anogo nung nebur ajaki akhüm agüja temeim salem bener arur.

Arishir tsüraburtem, Na tenarong anüa aküm asü? Tenük rabanga aküm asü? Tepu mabensai aküm asü? Tetsüng kangdena aküm asü? Tejak ashirüpa aküm asü?  Tekolak ku apua aküm asü? Ku tanak ajak temesüng aküm asü? Ne ola ajema aküm asü? Oh! arishirtem akhüm taket rongnung na ka lir, nai anüngba ola angashidang aser na mokoksümongi ayazüba angudang, ammang nelai onok dak nungi ajener ama ozü mulung lüma pelara neeh..! Na temulung ajema teli mesüra nesasa ne arishi küm asadanga temenungradaktsüma, kechiyong- “Kupu apuba kolakji sentsüwangshi korang; Aji temeshi taküm ajanga ajangzüker:” ta Apijemtsü shin 16:13 nung züluja aliba asenoki angur. Anungji teyanglusang Tsüngrem tenüng sanga nia iba rongnung denogo ta pela liangma.

Ken zülur nüngtugu tetsür Eliza Edmund Hewitt-i la tantsür küma arishi küm tatemleni arur ta meteta Tsüngrem nem tenüngsang agüja teimla tulu nung ken ka yamai zülu:

“Kü arishi tatem nungang tobur tajungba, ano ni Kibuba tashi amshia mapa kar inyaka tanelatem anir arudi aser kü sempet tulutiba bener tua hon yimti nung Kibuba tsüngdang noktakdang Yisui kü korang nung petinu kar danga adokdakja sentsü mewangshitsüli ma? ta züluba asenoki Ao osangtajung ken 223 nung atener, aji oda nenok mulung lemtet, terenemba Kibuba den yuangma.

Tatemsa, Tsüngremi kü nem apuoktsüba ken ka agi Arishir Tsüraburtem ajak tushia moatsünür.