Arju Autumn Fest Tuli 2019 takok ngua agiogo

Tzudikong, Mongputeni/October 11, 2019 (TYO): Arju Autumn Fest Tuli 2019 sentong October 10, 2019 Brehostibarnü tenzüka liasü. Iba sentong nung Minister of Housing, Mechanical, Government of Nagaland, Tongpang Ozukum alaktetta tesemdanger ama aruagi denogo, ta osang ajanga metetdaktsü.
Sentong nung Minister Tongpang-i jembiba mapang pai; CECS aser külem sentaktepa alir ajak longjemer iba ama festival sentong tulu ayongzüktsüba asoshi pelaba metetdakja liasü.
Tarutsü nung iba festival (Arju Autumn Fest) sentong tuluba küma aotsü ajitetba indang Tongpang-i lemsatep.
Tuli tesem alaktetta aser Nagaland nung tourism mapatong ajungkettsüba den külemi entrepreneurship ajungketa aser sempet tajung alirtem anidena nübur timba atsüa arutsü asoshi Arju Autumn Fest sentong dak tashi tulu lir, ta Tongpang-isa ashi.
Iba sentong ya Mengu Soukhrie-i ketdangsüa (host) liasü, kong la tepor ajungba aser tsüngro songa jembiba ajanga telok saksalemdaktsü. Sentong nungsa artists talisa Zuchobeni Tungoe, Sunep Lemtur, Toshimoa Jamir aser Dreamz Unlimited nungeri shilem agia liasü.
Maneni, ‘Battle of the Band’ tetoktepba sentong nung band temi ken ana – ‘cover ken ka’ aser ‘pei sasa mejemba ken ka’ tena liasü. Iba sentong nung tetokteper band tem rongnung Paradigm Shift (Dimapur), Amalgamates (Mokokchung), Dynamic Cardioid (Mokokchung) aser Dimapur nungi Orange liasü.