Arjun Kapoor-i Malala Yousafzai den ajuruteper

New York, Sept. 30 (Agencies): Bollywood actor, Arjun Kapoor-i Nobel Peace Prize agizükla, Pakistan tsür Malala Yousafzai den New York yimti nung ajurutepba osang jangjaogo.

Arjun-i Malala den ajurutepba sülen la den külemi noksa agitsü asüngdanga noksa agiba sülen Twitter page nung malokja liasü.

Arjun o Malala na ya New York nung ayongba Global Citizen Festival tezülen taoba hopta tatembanglen ajurutep.

Arjun-i International Champion, Global Goals & India Ambassador ama Global Citizen Festival nung shilem agi aser arishi küm 14 tain alidang Pakistan nung tentetba Taliban telok, Tehreek-e-Taliban züngsemtemi kasettsü merangla, arishi küm 18 tain Malala-i kasa sentong nung onük jembia liasü.

Tarutsü mapang, 2030 küm tashi nung alima tajungba kümdaktsütsü nükjidong nung sensakba tia agientsü, ochimashi inyakbaren samatsütsü aser alima tsüngdang mopung balaka küma melenshiba azüoktsü densema alizüng 17 tashi densemba Global Goals mapatong takok ngua inyaktsü nükjidong nung alima lenirtemi iba Global Citizen Festival sentong ya ayonga agiba osang jangjaogo.