Arkansas nung küm 12 sülen tepuokdak alir ka tasüba agi merenshiogo

April 21 (Agencies) : Brihostibarnü US anüolentip tsütsü anüdoklen aliba ‘death chamber’ Cummins Unit, Grady nung Ledell Lee tasüba agi merenshi.
US Supreme Court-i pa tasüba agi memerenshitsü züluba shidi magizükba sülen arishi küm 51, Ledell Lee Arkansas nung südaktsü.
Lee ya pa ‘death warrant’ tembangtsü ano minute pezü lia süogo ta metetdaktsü.
US Supreme Court-i Arkansas nung Lee dak ajem tuotsür tepsettsü temelaba agütsür liasü.
Lee atema okatsürtemi federal courts aser Supreme Court tem dang pa tepseta südaktsütsü mapaji khen anena alitsü temepishiba agütsür liasü.
US Court of Appeals-i Lee-i asüngdangba ama pa indang DNA tesüsa buba khen tendangtsü asoshi Brihostibar aonung 9:15 tashi ata alitsü tetuyuba agütsü.
Lee-i 1993 küm tyre indang merang agi Debra Reese zükseta azüba ken o nung aitsür pa tasüba agi merenshitsü obendang ngur liasü.
Reese’er kinungertemi Cummins Unit tepuokdak oa Lee ji tasüba agi merenshitsüla ta takhangba agüja liasü.
“Ozüng dak ajemdaker tasüba agi merenshiba ajanga Reese’er kibong anisüngzük angutsü ni imlaja atar,” ta Arkansas attorney general, Leslie Rutledge-i Lee tepseta südaktsütsü minute ishika lia ashi.
Aji oda süaka Lee atema okatsürtemibo pa tasüba agi merenshiba aitsü.
“Tasüba agi merenshitsü pur tem dak tuoktsüba mozü expire asütsü mapang atongba agi aritepa Lee indang DNA ano khen tendangtsü matai pa südaktsüba ajanga pa temeten kuli angutsü aliba maongka magitet,” ta Lee asoshi tatembangbuba temepishi agütsüba nung yariteper NGO telok, Innocence Project nung attorney tejen, Nina Morrison-i ashi.
Maneni Arkansas tepuokdak alir parnok nisung ana Hombarnü tasüba agi merenshitsü aser ano nisung ka April 27, 2017 nü ta tasüba agi merenshitsü anünga lir. Tepuokdak alir kabo taruba hopta tasüba agi merenshitsü aliba khen asoshi songtema yua lir.