Armed Forces ji sorkar küboki aiter, mesüra martial law lila: SC

New Delhi, October 28 (Agencies): Tanü Supreme Court (SC)-i, linük armed forces ji Cabinet aser sorkar tsüngdang nungi jenbua mali/ketdangsüba kübok aiter, ajioda mesüra linük nung martial law lila, ta metetdaktsü.
Taoba ita sepaitemi Pakistan-occupied-Kashmir (PoK) nung kiralongrartem tesep amakba densema Indian sepaitemi inyakba mapatem atema sorkari yimtenren tajangzük asoshi jembiba nokdangtsüla ta temepishiba ka benokba angadangba mapang Supreme Court-i iba o ya metetdaktsü.
Temepishiba benoksang jagi, armed forces ji Tir kübok lir, anungji sepaitem atema telemtetba agiba nung sorkari tiyongtsüi maitsüla, ta shia lir.
September 29, 2016 nü India sepaitemi kiralongrartem anema surgical strikes aoba sülen Defence Minister, Manohar Parrikar-i iba onük nung jembiba otem aikati aitsüogo.
Atangji Deobarnü Parrikar-i, “Ni ‘strike’ olong amshiba anenogo,” ta shiogo.
Parrikar-i surgical strikes telemtetba agiba atema “RSS tesayubatem” nem tenüng tajung agüja jembi ama angatet. Minister-isa tamalen Congress-i aniba UPA sorkari iba mesükba operations aoba indang jembiba aitsü, aser ibaji ashishia Congress-i, Parrikar-i iba onük nung jakdaka yimtenren aitdaktsür, ta aitsü.
Jammu & Kashmir, Uri nung kiralongrartemi India sepai 19 tepsetba sülen Ato kiloser, Narendra Modi-i, aibelenertem nem temerenshi magütsüi malitsü ta jembiba sülen September 28 ayaterm nungi tenzüka ghonda pezü shi PoK nung surgical strikes ao, aser iba mapang nung kiralongrar tesep tenet maka aika tepset.