Armenia ken o ajanga Germany o Turkey na tesendaktep meraksatsü: Yildirim

Germany yimsüsürtemi tesüiba mapang, WWI nung Turkey nunger Ottoman mitkartemi tamangba yimsü dak ajemdaker Armenia nunger Khristanpur jenti khen nung tepset ta agiba telemtetba anemertemi Turkey kübok Istanbul nung tentetba Germany consulate ki kimalen longkak aitdang agiba noksa ka yangi angur. (Istanbul, June 03)

 Istanbul, June 03 (Agencies): Germany yimsüsürtemi Armenia ken o den sentakba telemtetba agiba ajanga par linük aser Turkey na tsüngda tesendaktep meraksatsü ta Turkey Ato Kilonser, Binali Yildirim-i tanü, Hokolbar nü metetdaktsüogo.

Turkey nunger Ottoman mitkartemi tamangba yimsü dak ajemdaker tesüiba mapang, World War I (WWI) nung Armenia nunger Khristanpur jenti khen nung tepset ta Germany yimsüsürtemi yashi, Bodbar nü lemteta liasü.

“Germany aser Turkey na ya temba ayimba linük ana lir. Anungji, tan telemtetba agiba ajanga ozü linük ana tsüngda ajungbena tesendaktep meraksatsü,” ta Yildirim-i ashi.

“Ajisüaka, ozü linük ana tsüngda tesendaktep junga aliba ajanga Germany-i tan telemtetba agiba anema Turkey-i menokdaktsü ta mebilemtsüla kechiyong ozü linüki ozü temetenbo bushitsü,” ta pai sangoktsü.

Germany parliament lower house yimsüsürtemi yashi telemtetba agiba ajanga Turkey kanga jashidakja par Germany ambassador Turkey linüki shilangtsü tuyuogo.

“Germany-i tan telemtetba agiba ajanga ozü linük ana tsüngda tesendaktep mejungi kümdaktsüogo saka ozü Turkey-i Germany nem tapet telangzüba agütstsü,” ta Yildirim-isa metetdaktsü.