Armenia: Police den raradang nisung 75 yiru, 26 shi apu

Yerevan, July 30 (Agencies): Armenia nübur telok ka aser police na tsüngda yashi, Hokolbar nü kanga sashia raratepba osang ka sorkar ketdangsertemi tanü, Honibar nü metetdaktsüogo.
Armenia yimtiba, Yerevan nung tentetba police station telung nung tashiyim agi monga alir tongpang nung amshitsü prangpong abener opposition telok  pusemertemi police station telungi aitsü merang aser ibaji ajanga parnok o police na tsüngda kanga sashia raratsü tenzük.
“Tan lendong nung nisung 75 shi yiruba aser police-i nisung 26 shi pua ayuba osang jangjaogo,” ta ketdangsertemi ashi.
Tan lendong atalokba police station-ji prangpong abener nisung 30 shi densemba telok kati police ketdangser ka kasetba den külemi, parnok aika yirutsüba sülen tan July ita 17 nü tashiyim agi agiba osang jangjaogo.
Parnoki tashiyim agi police station nung monga, Armenia sorkari pua ayur tongti opposition telok lenir ka chioktsü takhangba benoktsü tenzüka lir.
Tan lendong atalokdaktsüba teloki Armenia Tir aser Ato Kilonser nata yimsüsütsü menden nungi anentsü takhangba benokba osang angazükogo.
“Police-i stun grenades amshia, opposition telok nokdangtsü merangba sülen police ketdanser 6 densema, ajak agi nisung 75 shi yiruba osang jangjaogo,” ta Armenia Health Ministry-ia metetdaktsü.
“Tan yirur rong nung nisung 25 tashi kanga mejungi yirua, parnok tang mozükidang monga taneptsü bushia aliba osanga jangjaogo,” ta ministry-isa shisem.