Arms Act ken o nung Salman anema kuli mangu

Jodhpur, January 18 (Agencies): Salman Khan-i ‘black bucks’ akahba ken-o nung pai bena aliba prangpong licence expire liasü, ta Bodhbarnü Jodhpur court nung ken-o jembia liasü aser pa anema kuli mangu.
Salman aitsütsü asoshi ken-o tejangja maliba ajanga pa temeten nguogo, ta lawyer, Bhawani Singh-i iba obendang agütsüba sülen osangbener den jembidang ashi. Tanü jembiba ken-o ya Salman anema okadak ken-o benokba pezübuba lir. Pai black bucks ana akahba ken-o ano matem lir. Salman Khan-i chinkara shiruru kahsetba ken-o ana Rajasthan High Court nung tamalen jembia liasü aser iba ken-o nunga pa metena lir.
Chief Judicial Magistrate Dalpat Singh Rajpuroti ajanga küm 51 tain, Salman Khan nem iba obendang agüja liasü. Iba okadak Salman aser teyi Alvira arua aden.
Salman Khan-i licence expire sür aliba prangpong agi Jodhpur nung aliba Kankani tesem nung 1998 küm October 1-2 nung black bucks akah, ta Arms Act kübok section 3/25 aser 3/27 nung ajemdaker ken-o benoka liasü.
Iba obendang agütsüba ya jungjunga shisadanger session court nung ken-o benoktsü, ta ken-o anir, B S Bhati-i ashi. Salman-i licence expire sür aliba prangpong amshiba kuli tejangja mongutet nung pa aitsütsü maliasü, ta obendangeri metetdaktsü.
Iba ken-o nung Salman anema ken-o tiyazü yanglur benok, ta Salman Khan metenja jembir Saraswati-i ashi. 2016 March 10 nung Salman okadak arua nokdaktang, pa tai mali aser pa anema forest department-i ken-o tiyazü yanglu, ta shia liasü. Iba obendang agütsüba sülen, Salman Khan-i pa sabur dang pelaba osang, Twitter nung lemsatep.