Army & Assam Rifles-i telungpur aika apu

Kohima, Aami/June 28, 2020 (TYO): Nagaland nung telungpur telok balala inyakyim mita aoba shilem ka ama, Assam Rifles-i Brehostibarnü Dimapur kübok Thahekhu anasa NSCN (K2) indang telungpur pungo apu, ta PRO (Defence) sangdong ka ajanga Lt Col Sumit K Sharma-i metetdaktsü.
Iba tesem nung telungpur ka aliba osang tejangja angazükba nung ajemdaker Assam Rifles den Nagaland Police longjemer mita aoba mapang parnoki hadir bena alir telungpur pungo pua liasü.
Assam Rifles-i apuba NSCN (K2) indang telungpur pungoprongla ya Col Weangna Konyak, 2nd Lt Nikato Aye, Sgt Maj Akahi Konyak, Sgt Wangtos Konyak aser Khapur Vikaho Sumi nunger ta jangjaogo. Team-i pranok ket nungi M22 Rifle ka den magazine, Carbine ka den magazine, Point 303 Rifles ana den magazine, Point 22mm Air Gun ka, Point 22mm Pistol pezü, 7.65mm Pistol ka aser Point 22mm Revolver ka den külemi rara dang amshiba hadirtem aser tashishitsü aketba document tem ngutet.
Iba maparen maneni bushisüngdangtsü atema, pua alir telungpur pungoprongla den parnok ket nungi ngutetba hadir ajak Sub Urban Police Station nung agütsüogo.
Kasa anogo, Burma Camp, Dimapur anasa Assam Rifles-i mita aoba mapang ZUF (K) indang telungpur ana apu.
Osang tejangja agir sülen, Assam Rifles team-i Burma Camp tesem mita aoba mapang parnoki ZUF (K) telungpur ana ya pua liasü.
Pua alir ZUF (K) telungpur ana ya Dima Hasao District, Assam kübok Nchureloa yimtsüng nungi Captain Haisuibe Pame (29) aser Kangpokpi District, Manipur kübok Phongla yimtsüng nungi Khapur Mariamka Thangabo Kumar (49) ta jangjaogo. Kasa mapang, team-i tena ket nungi rubber stamp aser ozüng alema rakzükraktemba maparen nung amshiba slip tem ngutet.
Iba maparen dak sendakba nung maneni bushisüngdangtsü atema, pua alir telungpur ana den külemi tena ket nungi ngutetba oset ajak East Police Station nung agütsüogo, ta sangdong nung shia lir.
Maneni, Bodhbarnü, Nagaland Police den Assam Rifles longjemer, Dimapur kübok Toluvi anasa NSCN (KN) indang telungpur ka puogo.
Iba tesem nung telungpur ka aliba osang tejangja angazüka, Police aser Assam Rifles team mita aoba mapang, parnoki NSCN (KN) indang telungpur ya apu.
Pua alisang ya Toluvi yimtsüng nungi arishi küm 40 tain Raja Peyu Joil Sema, ta jangjaogo aser team-i pa ket nung 9 mm Pistol ka den magazine aser injang pezü bener aliba ngutet.
Iba maparen dak sendakba nung maneni bushisüngdangtsü atema, pua alisang aser pa ket nungi nguteba oset ajak East Police Station nung agütsüogo.
Kasa sangdong ajanga angazükba agi, Indian Army den Arunachal Pradesh Police longjemer, Bodhbar anogo Longding District kübok Zedua anasa NSCN (IM) indang telungpur ana den iba telok maparen nung pusemer nisung ka pua liasü.
Osang tejangja ka angazükba nung ajemdaker team-i iba tesem mita aotsü maparen tenzük aser iba mapang parnoki telungpur 2 den nisung ka ya apu.
Team-i pua alir NSCN (IM) telungpur ana ya Sgt Maj Takha Naham o Pvt Tonglong Wangjen aser parnok den külemi inyaksang ya Chakpha Wangsu ta jangjaogo.
Iba district nung rakzükraktemba aser linük anema sentong tamajung atongba maparen nung par asemprongla densema lir ama temulung melemi bilemer, ta sangdong nung shia lir.
Kasa mapang team-isa telungpur ket nungi Point 32 Pistol ana, injang trok, mobile phone asem, opium gm 10 aser sen 5000/- ngutet.
Army aser Police team longjemer telungpur asem apuba ajanga Longding district nung NSCN (IM) telok maparen nung tamakok tulu adokdaktsüogo. Iba maparen dak sendakba nung bushisüngdangtsü atema, pua alir nisung asemprongla den parnok ket nungi ngutetba oset ajak Longding Police Station nung agütsüogo, ta sangdong ajanga metetdaktsü.