Army Chief General Dalbir Singh-i Manipur semdang

Imphal, May 25 (Agencies) : Bodbarnü Chief of Army Staff General Dalbir Singh-i Manipur nung JCO ka den jawan pungu kahsetba tesem semdang aser iba mapang pai sepaitem dang telungpurtem anema maneni raratsü tayongzükba agütsü.

Bodbarnep General Singh den Eastern Command nung Army Commander, Lt General Praveen Bakshi na Imphal tonga aru aser tenati Chandel district kübok Joupi nung aliba 29 Assam Rifles Battalion headquarters semdang.

May 22, 2016 nü sepaitem amakbaji CorCom ajanga inyak ta sepaitemi tai tongloktsür. CorCom ya Imphal valley nung amenoka aliba PLA, UNLF aser PREPAK telok asemi tentetba lir.

“Telungpurtemi iba ama tashiyim mapa inyakdang, asenoki tesem nung yimjung aser azükaru bener arutsü atema mapa inyaktsü nangzükba akangshir” ta General Singh-i tanü sepaitem ayongzüka jembi.

29 Assam Rifles Battalion headquarters nung ketdangsertemi Army Chief dang osang tejangja metetdaktsü aser iba nung telungpurtem aputsü atema mapa inyakba indang dena liasü, ta Imphal nung Assam Rifles sangdong ka nung metetdaktsü.

Yaküm June 5 nü Manipur kübok kasa district nung telungpurtemi sepai 18 tashi kahset. Iba mapang NSCN(K)-i Naga Army, Kanglei Yawol Kanna Lup (KYKL) aser Kangleipak Communist Party (KCP) nungi “elite strike unit” kati sepaitem amak ta tenüng agiba metetdaktsü.