Army doctor temi Manipur nung tetsür chanu ka kümzük

Kohima, Monupii/May 28 (TYO): Monupii/May 21, 2018 nikongdang Manipur kübok P Moulding, Leimakhong nungi arioshi küm asem tetsür chanu ka temang kanga mejungi Army’s Red Shield Division indang Army Hospital-i anir arua liasü; Seigoulen’er jala, Chongnei Nem two wheeler ung lendong atalokba ajanga la tekolak kanga mejungi yirur liasü, ta tanü Col C Konwer, PRO (Defence)-i sangdong ka ajanga metetdaktsü.
Tetsürlaji amejungi liasü, kechiyong ka süchia oor liasü, o mejembitet aser general seizures liasü.
Pei taküm kümzüktsü atema inyakba medem Army hospital nung medical staff temi Chongnei la shia arudaktsütsü atema inyak, nüngdakba mozütem la nem agütsü aser
La taküm azüoktsü merang. Item ajakji inyakaka la temang menani tamajungba aküm, ajisüaka Army doctor temi naneni la kümzüktsü meranga ventilator support nung ayu, ta sangdong nung shia lir.
Kanga aritepa menani yaripa ajanga la shia arua tajungba küma Amry Hospital ung aliab nüngdakatem amshia anasatiba civilian hospital, Raj Medicity-i teyari balala agüja anir ao.
Civil hospitalk nung aliba Neurosurgical Centre nung CT scan agiba ajanga tekolok yiruba ajanga cells/tissues waaker liasü ta jangja, aser tanübo tanutsülaji kanga tajungba kümdar, ta sangdong nung shia lir.
La jak nung taimaket merüen ngua Chongnei aser lar tsüraburtemi Army hospitak ung aliba doctor tem aser medical staff tem dang pelaba lemsatep, kechiyong mongintem teyari ajanga la taküm alangzükogo, ta kasa sangdong ajangsa metetdaktsü.