Army-i Kashmir nung yimjung bener marutettsü: CM Mehbooba Mufti

New Delhi, June 17 (Agencies): Honibarnü Jammu & Kashmir Chief Minister, Mehbooba Mufti-i, petsaprong aliba Kashmir nung prangpong mesüra army temi yimjung bener marutettsü, ta metetdaktsü.
State assembly nung MLA tem den jembidang Mehbooba-i, “Asen sepaitemi (Jammu & Kashmir nung) taküm tenla agütsür. Petsaprong aliba Kashmir nung prangpong mesüra Army-i yimjung bener marutettsü,” ta ashi.
“Tensa süngjemtsü atema lenmangji, maneni ken o jembitsü dang lir,” ta laisa ashi.
Yashi south Kashmir kübok Anantnag district nung kiralongrar telok, Lashkar-e-Taiba (LeT)-i police trok tepsetba sülen anogo ka lir tanü Jammu & Kashmir Chief Minister-i item o ya jembiogo.
Tanep Srinagar nung osangbenertem den jembidang J&K DGP SP Vaid-i, yashi amakba nung aibelener kiralongrartemji aputsü, aser aibelener nem tapet temerenshi agütsütsü, ta metetdaktsü.
“Bashir Lashkari leniba nung LeT-i police amak. Onoki pa bushitsü aser tim obendang agütsütsü,” ta SP Vaid-i ashi.
Taoba Hokolbarnü south Kashmir, Bijbehara tesem nung Indian Army, Special Operations Group (SoG) aser Central Reserve Police Force (CRPF) sepaitem senteper LeT lenir, Junaid Mattoo den züngsem ana tepsetba sülen ibaji mangyangtsü atema kiralongrartemi police amak südi ta bilemer.