Army-i Ladakh nung tetsür 18 tour yok

Jammu, October 16 (Agencies): Brihostibar nü Tiger Hill Brigade nung commander-i ‘Bharat Darshan’ tour atema Ladakh nungi tetsür tanur 18 apusodaktsüogo.

Item tetsür tem ya Ladakh kübok aliba Darchiks yimtak nungi lir aser ashiba agi iba yim nung Alexander den anidaker sepaitem dak nungi jakzükba Drukpa kintem alir. Alexander den anidaker sepaitem iba tesem toktsür aoba mapang kar moi yangji kiba lempua ali, ta Drukpa kin tar nunger otsü nung lir.

“‘Sadbhavna’ (goodwill) kübok Army-i tetsür tanur 18 den parnok anepalutsü tetsür tesayur ana yoker. Iba mapang parnoki Srinagar, Jammu, Dharamsala aser Chandigarh, yimtitem sema linük nung aliba sobaliba, kaketshisatsü, rongsen kettsüng aser historical tesemtem semdangtsü maongka angutsü,” ta defence otongdar Captain S.N. Acharya Jammu nung IANS dang ashi..

O jembiba mapang, Tiger Hill Brigade commander-i, item lanurtemi sobaliba aser rongsen kettsüng tsütsü linük-i mera tasen agiba jenti ajangshitsü. Item mapaji yimjung aliba tesem nungdang sadema inyakteter, ta ashi.

Iba tour ya anogo 11 nü asoshi alitsü. Tour jajadang Darchiks tsürtemi linük nung aliba nüngtugu tesem aika semdangtettsü.

Darchiks yim ya linük rangben senteper ‘Aryan’ yim pezü ang aliba rongnung ka lir aser iba yimtak alirtemji yimtsüng nungi madoki yimtak dang liteper.