Army-i sorkar nem ‘Surgical Strikes’ video clips agütsüogo

New Delhi, October 05 (Agencies): Tawa Army-i LoC nung kiralongrar teseptem amakba indang video clips army-i sorkar nem agütsüogo, ta tanü Union Minister, Hansraj Ahir-i metetdaktsü.
Minister of State for Home, Ahir-i, item ama onüktem nung inyakyim lir, aser ajioda Army aser sorkar napronglai inyakogo, ta ashi.
Ano külen Minister of State for Home, Kiren Rijiju-ia, ajaki sorkar dak tamang akatsüla aser army nem sadema inyakdaktsütsüla, ta ashi.
Osangbenertem den jembidang Ahir-i, “Inyakyim nung lateta aliba ama inyakogo. DGMO-i surgical strikes indang metetdaktsüogo. Ibaji Defence Minister mesüra Ato kilonser mesüra Home Minister-i metetdaktsü masü, saka DGMO-i metetdaktsü. Ibaji tim mapa aser parnoki (Army) ajioda inyakogo,” ta ashi.
“Mapang ka nungbo tezüluba nung kulitem agüja liasü. Tangbo iba putu melenshiogo. Tangbo video clips agütsür aser clips ji  agütsüogo,” ta paisa ashi.
Tawa army temi Pakistan occupied Kashmir (PoK) nung kiralongrartem amakba sülen nüburtemi iba kuliji agüjang ta sorkar dang akhangba mapang ka nung Ahir aser Rijiju nati item o jembiogo.
New Delhi nung osangbenertem dang Rijiju-ia, “Sorkar dak tamang kaang aser Army nem parnok teinyaktsü inyakdakjang,” ta ashi.
Mumbai Congress tongti, Sanjay Nirupam-i, surgical strikes ji tiyazü ta jembiba ajanga yimtenren nung aitsütepba tenzüka liasü.
Surgical strikes indang clips sayutsü atema sorkari shisadanga aliba mapang ka nung BJP lenir, Subramanian Swamy-i iba operation indang yanglushiba version ka sayutsü akhang, ajisüaka mongin aikati ibaji anema jembi.
Ahir-isa, “Army-i sorkar nem agutsüba video sayatsü mesüra mesayatsüji Ato kilonseri lemtettsü,” ta ashi.