Army-i taküm tenla agütsüba asenoki bilemtettsüla: PM Modi

New Delhi, January 15 (Agencies): Linük nüburtem kümzüka alitsü atema army temi tasüita tenzükba asoshi tenüngsang agüja tanü Ato kilonser, Narendra Modi-i, army temi mapang ajak nung India kümzüka aruogo, ta ashi.
Tanü Army Day anogomung nung Ato Kilonser, Modi-i twitter ajanga, “Army Day anogomung nung sepaitem, sepai nungi anisüngzüker alirtem aser parnok kibongtem ajak den salem lemsateper. Indian Army nung tasüita tenzükba atema onoki tenüngsang agütsür,” ta metetdaktsü.
“Indian Army-i mapang ajak nung tejakleni nungi anir, asen linük sorkar mesüra alima lendong balala mapang nung sensotem kümzüker,” ta paisa ashi.
Army temi taküm tenla agütsüba asenoki bilemtettsüla ta shia Modi-i, sensotem tesünep nung litettsü asoshi parnoki pei taküm lendongbang nung nokdaker, ta ashi.
“Asen army temi tenla agutsüba ajak atema asenoki nüma atanger. India nunger crore 125 tesünep nung litettsü asoshi parnoki taküm bendanga agütsür,” ta paisa shisem.
India nung British nunger yimsüsüba kübok Commander-in-Chief tesasabuba, General Sir Francis Butcher sülen 1949 küm January 15 nü Indian Army nung mezüngbuba Commander-in-Chief, Lieutenant General K. M. Cariappa-i Army tongti mapa agizükba nüngtem nung kümshia January 15 nü Army Day mungyonga arur. Iba anogomung nung linük yimtiba aser headquarters ajak nung parades aser military show balala sayaa amunger.