Army-i tesayur ka dena nisung ana kahset

Shillong, November 26 (Agencies): North Garo Hills district, Meghalaya nung school tesayur ka dena, motocycle ka nung nisung ana oya-a lia Army-i telungpur-a ta aibelena kahset.
Rajasimla yimtsüng nungi tesayur, Sweetbirth D Marak aser Alphuis Momin na Bodhbar aonung motorcycle nung kidangi oya-a lia Kharkutta tesem nung Army temi kahset, ta ketdangsertemi Brihostibarnü ashi.
“Iba tatalokba nung onok police ket nungi osang tajangja angutsü adar. Iba kahsetba nung magistrate-i bushisüngdang agidar,” ta district deputy commissioner SC Sadhu-i PTI dang ashi.
Kharkutta MLA Cherak W Momin-i iba tesem tanep semdang aser tai maketer kahsetba aitsüogo.
“Iba tatalokba ya kanga junga bushisüngdangtsü nüngdaker aser aibelena alirtem nem tapet temerenshi agütsütsüla,” ta Cherak W Momin-i ashidang pai, Army-i tan agi tanaben iba tesem nung iba ama lendong agütsür, ta shisem.
“GNLA ana indang osang tejangja angashiba sülen mita aoba mapang ka nung aonung 8:40 ako meta tenati anenang ta ashidang maneni jena ao. Iba mapang motorcycle mokozü aolen (silencer) nungi mi amai adokba agi injang agi akah’er ta bilemer onokia akah dang tenaprong yangji atanga kahset,” ta Army sangdong ka ajanga ashi.
Army nung ketdangsertemi iba tatalokba nung telung tonga ia bushisüngdangdar, ta kasa sangdong ajanga ashi.