Army-i Tirap District nung NSCN (IM) telungpur ka apu

Kohima, Aami/June 08, 2020 (TYO): Honibarnü, Arunachal Pradesh indang Tirap District kübok Deomali anasa Arunachal Pradesh Police den Indian Army longjemer mita aoba mapang parnoki NSCN (IM) telungpur ka apu, ta PRO (Defence) sangdong ka ajanga Lt Col Sumit K Sharma-i metetdaktsü.
Osang tejangja ka angazükba nung ajemdaker Army aser police longjemer iba tesem mita aoba mapang parnoki telungpur ya pua liasü.
Pua alisang ya arishi küm 44 tain Pvt Lomben Shin ta jangjaogo aser pa ya Arunachal Pradesh indang Tirap District kübok Lomlo yimtsüng nungi lir.
Iba tesem (Deomali) nung nisungba ya rakzükraktemba aser telok (NSCN (IM)) nung nübu tasen aniokba/shimokba (recruitment) maparen nung yakyaka inyaka liasü ama temulung melemi bilemer, ta sangdong nung shia lir.
Pa apuba mapang team-i pa ket nungi 7.65 mm Pistol ka den injang ana aser extortion kaket tem ngutet.
Iba maparen dak sendakba nung maneni bushisüngdangtsü atema, pua alisang ya Police Station Deomali nung agütsüogo, ta kasa sangdong ajanga metetdaktsü.