Army ketdangser kati taila khatepba kuli agütsür

Imphal, Chiteni (July) 31 (Agencies): Indian Army indang 3 Corps Intelligence Unit nung Lieutenant Colonel kati Manipur High Court nung affidavit ka benokba nung army telok kati Manipur nunger dak tashiyim agi sen saru aser tai maket nisungtem tepsetba shia lir.
Lieutenant Colonel Dharamvir Singh-i affidavit ji High Court nung benok. Pa kinungtsü Ranju Singh-i Habeas Corpus petition ka nung la kinungbo ozüng alema apu ta benokba dak sendakba nung Dharamvir-i iba affidavit agütsü.
High Court-i Army dang Luroi (August) 1 matongdang counter affidavit ka agütsütsü atema mapa latettsü.
Chiteni (July) 1, 2018 anepdang Lieutenant Colonel Nanda aser Major Rathore nati anir jawan temi Dharamvir Singh pur ao aser house arrest nung anogo pungu tashi yua lia yua okadak kati pa chioktsü tetuyuba agütsü ta affidavit nung shia lir.
Ajisüaka, Army-i iba onük magizüker aser ketdangserji posting atema yok ta ang ashir. Dharamvir Singh ya tang leave nung lir aser Imphal nung par kibong den lir.
Pai Unit nung telok kati aibelenba osang sangoktsüba sülen pa den temaba ketdangser kari pa anema mapa inyaker ta Singh-i affidavit nung shia lir.
Rongjui (September) 9, 2016 nü pai tashiyim agi sen meshiba aser tai maketba Manipur nunger asangur kar taila khatepdang khasetba atema shidi ka zülu. Manipur nunger asangurtemji Nagaland kübok Dimapur nung apu aser anameta aliba Rangapahar Cantonment nung tepset, ta affidavit nungsa shia lir.
Ajisüaka, temapur ketdangsertemi rongshiba den aibelenertem (army) anema mapa inyaktsü ta nangzükba sülen pai züluba shidiji pai meyipa agi, ta Singh-i ashi.
2010 aser 2011 tsüngda 3 Corps Intelligence Unit nungi telok kati taila khatepba asem aser tashiyim agi sen saruba mapa inyak, ta Singh-i agütsüba affidavit nung shia lir aser September 9, 2016 nü pai züluba shidi okadak agütsütsü atema paisa asüngdang.
Metsüremi (March) 10, 2010 nü Manipur nunger asangur asem- Phijam Naobi, RK Ronel aser Th. Prem nunger 3 Corps Intelligence Unit nungi telok kati Dimapur nung apu aser parnok Mess tesülen tepset. Iba tatalokba atema media nung March 17, 2010 nü Karbi Anglong kübok Lakhijan nung mang asem anguba shia angutsü, ta affidavit nungsa shia lir.
Iba dak sendakba ken o ka Gauhati High Court nung benoka lir aser iba tatalokba atema Major T. Ravi Kiran-i mezüng Metsüremi (March) 12, 2010 nü General Officer Commanding (GOC) dangi shidi ka zülu. Manipur nunger lanur asem Army indang intelligence surveillance wing-i apu aser parnok reshikangshiba sülen tepset ta T. Ravi Kiran-i züluba shidi nung shia lir.
Ano, Tsüklai (February) 5, 2010 nü kasa teloki Shillong nung ST Dominic College kaketshir Manipur nunger Satish den par medemer ka apu aser tenaprong Masimpur arem nung tepset. Satish’er tsüraburi February 23 nü DGP Manipur den nisung samaba ken o ka benok saka tanü tashi iba atema mapa kecha meinyak lir, ta affidavit nungsa shia lir.
Luroi (August) 18 nü Dimapur nung SM College anasa PLA züngsem G Jiteshwar Sharma (Gypsy) den par medemer ka apu aser tenaprong tepset. Tena indang mangji unit mess sülen are maser unit nisung kari tena aremdak jungjunga meteta lir, Singh-i agütsüba affidavit nungsa metetdaktsü.
Kasa unit jagi Dimapur nung tetsür ka den lar jala apu aser lar kibong nungi sen crore 1 meshiba sülen tena chiok ta affidavit nungsa shia lir.
2017 küm Gauhati High Court nungi tuyuba nung ajemdaker Dimapur Police-i iba dak sendakba nung Special Investigation Team (SIT) ka tentet aser ken o nung densema aliba Army züngsem ajak jaoka asüngdangya mapa lemzüktsü. Ajisüaka, tang tashi nung SIT-i army ka danga jaoka asüngdangya masü ta affidavit nungsa shia lir.