Army ketdangsüba kübok Indo-Bangla arrtsü shibangtsüla: Assam

Guwahati, Sept. 01 (Agencies): Assam sorkari Centre dang Army ketdangsüba kübok India-Bangladesh arrtsü shibangdaktsüner ta mepishiogo, ta tanü state Chief Minister, Sarbananda Sonowal-i metetdaktsü.
Guwahati nung osangbenertem senden ka nung jembidang Sonowal-i, “Indo-Bangla arrtsüji tekaraba nung shibangtsüla, ibaji onok nükjidong lir. Onoki Centre dena aiben jembiogo. Onoki iba mapaji Indian Army leniba kübok inyakdaktsüner,” ta ashi.
“Tang aliba atsü yangluba osettemji majung. Ozüng alema aitertem nokdangtsü atema atsü atsüba osettemji tajung asütsüla,” ta pai ashi.
Sonowal-i aniba sorkar anogo 100 ajungba anogomung nung pai, “Ni anir minister temi ‘ochimashi nokdangtsü’ omen nung inyaker,” ta ashi.
“Taoba sorkar mapang ochimashi ajanga nüburtem timtema liasü. Onoki meranga inyakba ajanga nübur nem anisüngzük agütsüogo. Ozü minister temi ochimashi indang jembiba dang masü saka iba tebilemtsü anema inyaker,” ta pai metetdaktsü.
“Ozü sorkari osettsüset nung jenjang atuba azüoktsü atema inyaker. Delhi dang nungibo Assam nung jenjang tajemba lir,” ta paisa ashi.