Army maitsüdangyongi kanga kümdanga shisadangtsüla: WB Angh

Kolkata, December 03 (Agencies): Honibarnü West Bengal Chief Minister, Mamata Banerjee-i, Angh, Keshri Nath Tripathi-i, ‘meshisadangi army anema jembibaji kanga tia maka; army maitsüdangyongi kanga kümdangtsüla’ ta jembibaji pai Centre sorkar tenüng nung jembiba lir, ta aitsü.
Honibarnü Kolkata nung osangbenertem den jembidang Chief Minister Mamata Banerjee aitsüba olen ka nung West Bengal Angh, Keshari Nath Tripathi-i, “India army ama tentet ka anema mejembitsüla. Army ama tentet ka maitsüdangyongi ajaki kümdangtsüla. Army tenüng memenüktsütsüla,” ta jembia liasü.
Chief Minister, Banerjee-i state sorkari memeteti state nung aliba toll plazas nung army mapa lemzüktsüba atema Centre aitsüba sülen state Angh, Keshri Nath-i lai jembiba oji ashishia jembi.
Mamata-i sangdong ka ajanga, “Anghi Centre sorkar tenüng nung jembir! Anogo 8 nü tashi pa state nung maliasü,” ta metetdaktsü.
“Sangdong magütsüdang osang ajak junga jangjatsüla. Iba ya tia maka tatalokba,” ta Trinamool Congress tongti, Mamata-ia ashi.
Yashi Kolkata nung Trinamool Congress MLA tem aser minister temi Raj Bhavan kima, toll plazas nungi army tem tangsa agientsüla, ta takhangba agüja longkak aita liasü, ajisüaka Angh yimti nung maliba ajanga parnoki pa majurutet.