Army nemsa tashi agütsür

Asenok aikati memetettsü, kechiyong aiben mapa aika nung asenok dak matalokra asenoki zübazübaa bilemer, saka tan ita nungi ano ita trok Nagaland ajaklen nüngdak dang süra mashi mapang ka nung, mashi ki lapoka mittsü aser temulung melemtetba kuli kija agia nisung kasettsüba dashi army nem tashi agütsüogo. Iba ozüng dang Armed Forces (Special Powers) Act, (AFSPA) 1958 ta ajar. Aji oda, kodang tesem kar nung danga government-i temzüng ozüng shitak mamshitettsüsa timtem lendong lidir, iba tesemji central government-i “Disturbed Area” ta sangdonger aser yangji army-temi kecha marendaki tashi amshitsü atema AFSPA ozüng ya latet. Atangji, Nagaland nung iba ozüng amshiba ya tanü tasen masü saka state mangu dang nungi iba ozüng ajanga asenok kangshia aru aser state ngur külena, state government liaka, army-temi tashi amshiba ajanga asenok aika timtem takoksa aser maksü ajuruogo. Iba kuliji küm ishika jakdang Mokokchung aser Kohima nung tai maketba nisungtem asütsüsa anüngdang yimti tiyong nung injang bomb yokba aser ki dena rongdoktsüba mapatem asütsü. Aji oda, state government liaka, state nung AFSPA ozüng ya ali tashibo asenok ya army yimsüsüba kübok alir, kechiyong parnoki nisung kar dak temulung melemi bilemra, itemji mittsü aser kasettsü dashi parnok ket nung tashi lir, anungji parnok atemaji shinga danga temelaba agitsü nüngdak madoker. Asenoki memetetba agi shisabolua mebilemer dang ashi, tanü ajungbenaka army-tem kidangi arur asen kaseta yutsü nunga, parnok aidakbo malitsü, kechiyong aseni parnok yirutsütsüla amato parnoki temulung melemi bilemba agi kaset ta dang parnoki ashitsü aser aji AFSPA agi melaa lir. Ano, tesem aika nung mekatep ser nung katepdang kaset amai nisung kaseta yutsür (fake encounter) taila otsü yanglur. Asenok asoshi lendongji aji lir. Atangji, ozüng raksartem bushidang katepa kateptsü aser nisunga asütsü, aji alima yimya. Ajisüaka, temulung melemi bilemba kija agi nisung ka kaseta yutsütsü temeten aser temelaba agütsüba ozüngjibosa agientsüla. Iba ama meimchir dang maochii inyaktsüba ozüng ya akhidang India nunger British yimli kübok aliba mapang, India nunger yimten nüchiso bushirtem anema inyaktsü asoshi British nungertemi latetba ozüng lir. Tanübo, iba kasa ozüngji India nungertemi Naga nunger dak benshitsü tatidaka matidaker. Bilemdangra, iba ama ozüng tesashi agi British nungertemi India nunger nüchiso bushirtem dak inyakba dang nungi kanga agia tamajungba aser tesashiba India nungertemi Naga nungertem dak inyakogo. Nagaland state kümer tang tashi kena manen iba Disturbed Area Act kübok asenok alir. Ano, yamaisa ao nungbo tang ita trok atema atsünglangba mapang ya December ita nung temadoktsü aser anosa ita trok atema atsünglangtsü. Akhidangbo, Naga nunger lokti tentettem, talisa Human Rights teloktemi Nagaland Disturbed Area Act aser AFSPA ozüng küboki aitdaktsüba aser iba ozüng küboksa alitsü atema mapang atsülangba telemtetba anema aija ola adok, saka tanü asüngbo iba ozüng anema ola adokba kanga ajema kümogo. Ashiko, Nagaland nung tashiyim inyaker aika aliba agi, itemji azüoktsü atema AFSPA alitsü nüngdaker ta asenoki bilema alitsüa akok. Iba denji ano Goonda Act dena lateta amshi nung dang Nagaland nung tashiyim agi sarusachiba mapatem ya azüoktettsü ta bilema alitsü. Ajisüaka, AFSPA ama nisung dak taochi maka inyaktsüba ozüng ya meliaka, ozüng raksartem anema inyaktsüba atemabo tanga ozünga peria lateta lir. Itemji amshitsü purtemi mamshitetterba dang lir. Kechi mapa südir süaka, tuluba aser tamajungba matalokdang nokdangsa tajungba, anungji AFSPA tashi amshia army-temi nisung alidak akhidang ama injang bomb meyokdang aser kidangi arua asen dak tamajung meinyak dang, asenoki AFSPA ozüng agütsüba anema yabo ola adoktsüla. Iba ozüng ya ali tashibo, kecha tai mali ser nung asenokbo nisunga masü ama Indian army dang tsübua alitsü.