Army nung tetsürtem nem raraba shilem agütsütsü: Rawat

New Delhi, June 04 (Agencies): Indian Army nung temelenshi ka adoka tetsürtem nema raraba shilem agidaktsütsü atema inyakdar.
Tang alima nung linük ishikati dang sepai nung tetsürtem nem raraba shilem agütsür.
Indian Army Chief, Gen Bipin Rawat-i, army nung teburtemi dang raraba shilem agir, ajisüaka tetsürtem nema raraba shilem agütsütsü atema maparen kanga keraa inyakdar, aser tamasabo tetsürtemji military police nung shimtsü, ta metetdaktsü.
“Tetsürtem army nung shimoktsü atema ni kobi melii tenzüktsü. Tamasabo onoki tetsürtemji military police jawans ama shimtsü,” ta paisa metetdaktsü.
Tang tetsürtem ya Army nung medical, legal, educational, signals aser engineering wings ama nung dang shimoka inyakdaktsü, saka onük kar nung ajemdaker parnok nem raraba shilembo magütsür.
Army tongti, Rawat-i, tetsürtem army nung shimtsü atema tebilemba lir aser iba atemaji sorkar den jembidar, ta metetdaktsü.
“Onoki iba maparenji tenzükogo,” ta pai osangbenertem dang ashi.
Tang alima nung Germany, Australia, Canada, US, Britain, Denmark, Finland, France, Norway, Sweden aser Israel linüktemi dang tetsürtem nem raraba shilem agüja lir.
Yaküm Indian Air Force nung otsü tasen ka yanglua IAF-i tetsür asem fighter pilots shima liasü.
Tang IAF indang fighter squadron nung züngsema aliba tetsür asemji- Avani Chaturvedi, Bhawana Kanth aser Mohana Singh nunger lir.
Ano külen Indian Navy-isa Navy rongtem nung tetsürtem anioktsü atema tang tejembidak lir.
Tang Indian Navy-i tetsürtem legal, logistics, naval architecture aser engineering departments nung anioka inyakdaktsüdar.