‘Army of Caliph in India’-i Syria nung raratsü atema nüboyimer

Delhi/Mumbai, January 27 (Agencies): ISIS telok ajanga ajungmesoba kiralongrar telok, Janood-ul-Khalifae-Hind mesüra ‘Army of Caliph in India’ telok ya linük nung amokmeren tasen ka kümogo, ta media osang ajanga ashi.
ISIS telok ajanga ajungshiba telok ya senotsü peria anguba telok ka lir aser iba telok nung linük tesem ajaklen nungi züngsemtem lir, ta osang angazüker.
India Today osang ajanga ashiba agi, National Investigation Agency (NIA)-i bushisüngdangba ajanga, züngsem tasenpur shimokba nung senotsü jenti amshir, ta bushitogo.
Kasa osang ajanga ashiba agi, tang pua alirtemi züngsem tasenpur aika shimokogo.
Iba den külemi tang shimoka alir karbo Syria linüki oa Islamic State/ISIS nung adentsü atema senotsü anepaluja lir.
Mapang tatsüka tsüngdayongi Janood-ul-Khalifae-Hind teloki parnok India tesem ajaklen aliba metetdaktsüogo, ta kasa osang ajanga ashi.
Parnoki linük nung kiralongra inyaktsü aser training camp amenoktsü atema tesemtem shimtsü sentong liasü, ta kasa osang ajanga ashi.
Ano Mumbai nungi tanga osang ka nung, ISIS-i India nung züngsemtem shimoker aser senotsüji Hawala ajanga arur, ta ashi.
Bodhbarnü Maharashtra ATS-i, India nung linük anemba telok ka tentettsü atema ISIS den tesentakatep alir- Muddabir Sheikh nem sen agütsü, ta ashi.
January 22 nü arishi küm 33 Mudabbir ya Maharashtra ATS aser NIA nati senteper apu.
ISIS-i Mudabbir dang, India ajaklen ISIS tangatetba proktsü aser ISIS nung dentettsüpur lanurtem jangja shimtsüla ta tuyua liasü. Ano tawa UP nung nisung ka tenüng agi Rizwan Nawazuddin puogo aser pai Muddabir maparen nung yaritepa liasü.
“Pa (Mudabbir) dang nisungtem jangja-a ISIS nung adentsü atema yoktsü mapa lemzüktsü. Acha ayangertemi Mudabbir nem Jehadi kakettem online ajanga agütsü. Item online kakettem nung bomb yanglutsü tuyua lir,” ta police osang ajangasa ashi.