Army School ka nem Lt. Ummer Fayaz tenüng jaloktsür

Srinagar, May 13 (Agencies): Honibarnü Army-i school ka nem Lieutenant Ummer Fayaz tenüng jaloktsü aser par kibong nem sen lakh 75 indang cheque ka agütsü.
May 10, 2017 nü telungpurtemi khasetba Lieutenant Ummer’er kibong nem Army Group Insurance Fund ajanga sen lakh 75 aser pa aliba regiment- Rajputana Rifles nungia sen lakh 1 cheque agütsü.
“Victor Force nung General Officer Commanding, Major General B S Raju-i Kulgam district nung tsür kibong semdang aser Army-i par kibong den külemi lir aser teti yariteptsü mulunga lir ta nangzük” ta Defence Ministry Spokesman, Colonel Rajesh Kalia-i osangbener dang ashi.
“GOC-isa Lt. Ummer’er kibong dang pa tepsetertem nem temerenshi agütsütsü ta nangzük. Paisa, iba tesem nung aliba Army school ka nem ‘Lt. Ummer Fayaz Goodwill School’ ta tenüng jaloktsütsü sangoktsü” ta Colonel Rajesh-isa shisem.
Lt. Ummer ji sodi agir Kulgam nung par kibong semdangba mapang tepset. May 9, 2017 nü Batapura yimtsüng nung par kinunger ka jala kiyimba sentong nung adentsü atema aodang telungpurtemi pa pua bener ao.
Iba sülen Shopian district kübok Harmen nung pa injang agi khaseter angu.
Rajputana Rifles nung ketdangser Lt. Ummer ya yaküm December ita Army nung aden.