Army temi 1965 rara takok anguba Golden jubilee among

New Delhi, September 05 (Agencies): 1965 India-Pakistan rara nung India-i takok tulu anguba atema Indian Army aser linük ajungai golden jubilee benjung mungdagi aser iba dak sentakba nung Army Aero Nodal Centre (AANC), Mhow-i Honibar nungi Mhow nung Micro light flying expedition tenzükogo.

Micro light tayimtsü asem nungji ketdangser trok mener Madhya Pradesh, Rajasthan, Gujarat, Punjab aser Haryana state tem nungi yimti 12 sema senzür September 18 nü Mhow-i meyipa arutsü.

Tanep Mhow- Pithampur road, Hema Field Firing Range anasa aliba AANC nung Military College of Telecommunication Engineering (MCTE) commandant Lt Gen, RS Panwar-i flying expedition sentong tenzüktsüogo.

Iba sentong metenzüktsüdang Panwar-i AANC in charge Lt Col MS Chawla nem wako agütsü aser züngsem trok team denji noksa tangoka liasü. Iba sentong nung army ketdangser aika denogo.

Iba expedition nung shilem agir pilot temji Lt Col MS Chawla (team lenir), Col MS Randhawa, Maj Aby TM, Maj SM Gupta, Suja Ram aser Bahadur Singh nunger lir.

Microlight flying ya National event ka lir aser AANC (Microlight and Powered Hang Gliding) Mhow ya Army Adventure Wing (AAW) lenisüba kübok inyaker.

Iba flying expedition mapang anogo 13 tsüngda item tayimtsütem jagi kilometer 3250 sema ayimtsü. Tayimtsü ayimba lenmangji Mhow, Ahmedabad, Bhuj, Jodhpur, Bikaner, Bhatinda, Hissar, Patiala, Hindon, Agra, Gwalior aser Kota asütsü, iba dak alia yimti aser jila aika adena ayimtsü. Iba expedition mapang tesem ti- Bhuj, Jodhpur, Bikaner, Bhatinda, Hissar, Patiala, Delhi aser Kota nung ‘Banners’ sayatsü.

Tesüiba mapangtem nunga Army Microlight flying team-i item ama sentong aiben agiogo, aser iba expedition dang ‘The Mountain Eagles’ ta ajar.

Parnokisa 1965 Indo-Pak rara nung taküm bendanga agüja asür sepaitem nem akhüm agütsüba den Indian Army tashi sayatsü.