Army tongti atema Bipin Rawat shimba Congress, Left-i ashishir

New Delhi, December 18 (Agencies): Centre sorkari army nung senior ketdangser ana ajateta army tongti atema junior ka shimba aija tanü Congress aser Left party-i Ato kilonser, Narendra Modi dang, kechi kulitem nung ajemdaker senior ana ajateta army tongti menden atema junior ka shim, ta asüngdang.
Osangbenertem den jembidang Congress Party lenir, Manish Tewari-i, sorkari tenteta aliba rejutem den asayar aser army nunga yimtenren aitdaktsür, ta aitsü.
Modi-i aniba sorkari army tongti atema senior ketdangser Eastern Army Commander Lt Gen Praveen Bakshi aser Southern Army Command chief Lt Gen P M Hariz na kübok alir ketdangser Vice Chief of Army Staff Lt Gen Bipin Rawat ang shimba sülen opposition party-i iba ya ashishia jembiogo.
Sorkar aija CPI lenir, D Raja-ia, army, judiciary, CVC, acting CBI director aser Central Information Commission shimba nung tashishitep adokogo, ta ashi.
Sorkar aija Raja-i, “Army nung ketdangser shimba ya tashishitep adoktsüsa kumogo, judiciary nung shimba nung tashishitep lir, CVC, CBI director aser CIC shimba nung tashishitep lir, temaba menden atema shimba inyakyim nung tashishitep kanga adokogo,” ta ashi.
Raja-isa, iba ya kanga tia maka; democracy aser linüki aginüba ama masü, ta sorkar aitsü.
Congress-i sorkar aitsü atema BJP-i, defence forces nung yimtenren maitdaktsütsüla ta ashiba den külemi, tang security tensa reprangdanger Gen Rawat shim, ta ashi.
BJP National Secretary, Shrikant Sharma-i, tang army tongti tasenbaji senior ketdangser pongu rongnungi shimba lir, parnok ajak temsüa lir, ta ashi.
Congress lenir Tewari-i, “COAS-i shimba Lt Gen Rawat ji ajak nung temsüa alitsüa akok, ajisüaka seniority nung ajemdaker shimba tentet (army) ka nung senior ketdangser asem- Lt Gen Praveen Bakshi, Lt P M Hariz, aser Lt Gen B S Negi nunger paidoker shimbaji kanga süoki ia agia tasüngdangba akatsü nüngdak,” ta ashi.
New Delhi nung aliba party office nung osangbenertem den jembidang Tewari-i, senior ketdangser sendoka yutsür shimtsüsa akumba kulitemji Ato kilonser, Narendra Modi-i ashitsüla, ta ashi.
“Iba (army) nung ya joko küm 20 shi seniority apir shimmer, anungji kechiba sorkari ibaji akhümtsübua mezüngshir. Item ketdangsertemji (senior) langka kar nung temsüa mali asü ? Asü iba ya BJP-i aniba NDA sorkari tejak repranga shimba?” ta pai asüngdang.
Taoba mapang Union Minister Tewari-isa, “Sorkar dang langka asüngdangra, pa/laji linük anemer ka ta parnoki bilemer. Armed forces atema tim tasüngdangba ka asüngdangra ibaji linük anema asü?” ta ashi.
Senior tem sendoka yutsür army tongi atema tangar ka shimba kuliji sorkari linük nüburtem dang ashitsüla, ta paisa ashi.
“Item ya public appointments lir. Indian army tongti kati army million ka anishir. Anungji iba ama tim mesiü inyakba atema asüngdangtsüji tim,” ta pai ashi.
“Demonetisation mesüra kechi onük südir süang, Ato kilonseri pai inyaknüba ama telemtetba ajak agitettsü ta pai bilemer,” ta Tewari-i ashi.
Yashi Defency Ministry-i sangdong ka ajanga, “December 31 nikongdang nungi taruba army tongti atema sorkari vice chief of army staff, Lt Gen Bipin Rawat shimogo,” ta metetdakja liasü.