Army tongti, Bipin Rawat-i anogo asemnü Ladakh semdangtsü

New Delhi, Aug 19 (Agencies): Doklam nung India aser China sepaitem rara adoktsüsa aliba tensa ka aliba mapang nung Army tongti, General Bipin Rawat-i Deobarnü nungi tenzüka anogo asemnü Ladakh semdanga tensa asadangtsü.
Iba mapang nungji pai arrtsülen security koma renemshia lir, ibaji asadangtsü aser tongti commander tem den tongtibang onüktem nung o lemteptsü.
India aser China sepaitem tsüngda Ladakh kübok Pangong awatsüng anasa raratepba sülen anogo ishika tsüngda Rawat-i iba tesem semdanger asütsü.
Mongolbar anepdang 7:30 ako meta Pangong Tso awatsüng anasa linük ana sepaitem raratepa liasü. Kilometer 135 talang awatsüng shilem asemsü nung shilem ka India kübok lir aser tanüngba shilemji China kübok lir.
Iba anogo nungji linük ana sepaitemi prangpong-injangbo mamshi ajisüaka teka sangshia raratepa liasü, ta osang angazüker,.
Ajisüaka Hokolbarnü osangbenertem senden ka nung jembidang Ministry of External Affairs (MEA) otongdar, Raveesh Kumar-i, iba rara nung long aser insang amshi asü mamshiar pai mejangja, ta ashi.
Ano tanga osang ka ajanga ashiba agi, Hombarnü Tir, Ram Nath Kovind-ia Ladakh semdangtsü aser iba mapang nung pai Ladak Scouts nungi battalions nem President’s Colours agütsütsü, iba sülen meditation centre ka semdangtsü.