Army tongti-i Major Gogoi nem sempet agütsü

Srinagar, May 22 (Agencies): Major Leetul Gogoi-i Jammu & Kashmir nung telungpur anema raraba nung tasütait mapa inyakba atema Hombarnü Army tongti, Bipin Rawat-i pa nem sempet agütsüogo.
Taküm Kashmir kübok Budgam nung lung amshia longkak aitertemi sepaitem indang gari ka amaktsü merangdang ibaji nokdangtsü asoshi Gogoi-i longkak aiter ka army jeep nung lisü agi alenlok, aser ibaji ajanga sepai ti kümzük. Iba noksaji social media nung prokshiba sülen pa nüngtugu aküm.
Social media nung iba noksa prokshiba sülen Mysuru-Kodagu nungi BJP MP, Pratap Simha-i Gogoi pusema twitter ajanga, “Tasütait Maj Gogoi anema temerenshi ka agütsütsüsa süra, asenoki pa pusema linük tesem ajaklen campaign ka tenzükdi,” ta lemsatep. Iba sülen social media nung aikati Gogoi pusema liasü.
Army sangdong ka ajanga, Major Leetul Gogoi-i Jammu & Kashmir nung telungpur anema tasütait mapa inyakba asoshi pa nem COAS Commendation Card agütsüogo, ta metetdaktsü.
Arishi küm 38 Major Gogoi ya Assam nungi aluyimer ka jabaso lir.
Pa arishi küm 18 asüdang sepai nung aden aser Assam Regiment 3rd Battalion nung sepai ka liasü. Iba sülen pa Dehradun nung amenoka aliba Army Cadet College (ACC) nung ketdangser aküm. Ajiser, 2008 küm pai Army nung lieutenant jenjang angu.
Army Service Corps (ASC) ketdangser, Gogoo-i Kashmir nung Rashtriya Rifles tenzüktsü atema mulungteta liasü.