Army tongti Rawat CCS Chairman shim

New Delhi, September 26 (Agencies): Hokolbarnü Army tongti, General Bipin Rawat-i Indian Air Force Chief, BS Dhanoa ket nungi Chiefs of Staffs Committee (CCS) Chairman mapa agizüktsü; Services asem- Army, Navy aser Air Force nungi tongti asem rongnung seniority apir Chiefs of Staff Committee Chairman shimmer aser Dhanoa September 30 nü mapa nungi anisüngzüktsü lia Rawat-i pa melener.
Naresh Chandra Task Force-i benokba nung ajemdaker 2012 küm CCS menden ya tentet. CCS nung züngsemtemji Indian Army, Indian Navy aser Indian Air Force nung tongtitem lir.
Tang tesüsabuba CCS Chairman atema sentong agir asütsü, kechiyong taküm August 15 nü Independence Day sentong nung jembidang Ato kilonser, Narendra Modi-i, kobi melii linük nung Chief of Defence Staff (CDS) tentettsü, ta sangdongogo.
Osang angazükba agi, Centre sorkari CDS menden atema nübo bushi tenzükogo.
Ato kilonser Modi-i, CDS menden tentetba ajanga service asem tsüngda amalitepa inyakba ajanga sepaitem ano tashi taitba akümtsü, ta metetdakja liasü.