Arnold-i jabaso Joseph-a pa ama tashi tait kümdaktsüner

Los Angeles, April 19, 2016 : Actor Arnold Schwarzenegger-i par jabaso Joseph Baena-a pa ama tashi tait kümdaktsüner südi.
“Terminator Genisys” film nung tongti shilem agisang, Arnold-i arishi küm 18 tain, jabaso Joseph gym-i anir oa exercise tesashi agidaktsür.
Schwarzenegger-i Venice, California nung aliba ‘Gold’s Gym’ nung jabaso Joseph nem exercise tesashi agidaktsüba taoba hopta ngushi.
tmz.com-i tangokba noksa kar nung arishi küm 68 tain, Arnold-i par jabaso sülen tula aut sentsü ka den jean longpant anüng sentsü ka semer exercise agitsü ajungshia noktakba angutsü.
Noksa nungsa Joseph board ka nung anünglen shia mejanger ‘dumbell’ teka anatsü kaka amer ajungshiba angutsü. Pa exercise agiba mapang T-shirt temerem ka semer teben nung ‘band’ aika inoker angutsü.
Joseph ya Schwarzenegger-i tesüiba mapang par kidang yariteper, Mildred Baena den sosemba jabaso lir. Mildred Baena ya Schwarzenegger’er kibong den joko küm 20 dak tema yaritepa arur.
Kinungtsü Maria Shriver den küm 25 lir 2011 küm balaba sülen ang Mildred Baena den pa medemba otsü ya tema adok.