Arogo aser Mission: Shir Mission?

– N. Imtitoshi Longkumer, Ungma

Tsüngremer nükjidonji meimchir temenen talenba nungi kümzüktsüba aser teti tatem maka pa alidaki anir aotsüba ta asenoki metet, iyongji Tsüngremi meimchir kümzüktsü mechi par ajaso chir aliba iba lima-i yok (Yohan 3:16), tetezü Tsüngremer missionji asenok kümzüktsüba liasü ta asenoki iba lai nungi kanga jangja angateter. Süra mission ya shir indang? Mapang talangka mission ya Arogo indang aser Arogo nem nungloktsüba mapa ka lir ta sür maparen aika inyaka aruogo aser tanüa Arogo aikati mission ya Arogo mapa teinyaktsü ka ta sür inyakteper. Anungji aiben iba tangatetba dak ajemdaker mission mapa inyaker asünung asenoki (Arogoi) missionji chichiba Tsüngremi mulungba nung masü saka Arogoi (asenoki) mulungba nung jajar aser jajar alir. Arogotemi inyakba mapatemji majung aser meinyaktsüla ta shinerba masü saka mezüng nungi missionji Tsüngrem meyong asü nung Arogo-ia aji angateta inyak nung Tsüngrem sentong atakloktsür asütsü.
Aieben asenoki missionji asenok nem nungloktsüba mapa aser khuret ka ama bilemba agi asenoki rongdak inyaktsüba mapa tem meinyaker saka tesülen-a inyak ajungtsüba mapatem tama inyaker. Tanü Arogotem aika konang aser nüngsang nung sangsu (competitive nature) tuteper amai shir Arogoi missionary timba yoker, shir Arogoi missionary alima talangtibai yoker, shir Arogoi outreach/foreign mission timba yoker aser rongsen timba mission wadang asoshi paoktsür ta tokteper amai ajiteter. Hau, atangji item ajakji kanga tongtipang aser Tsüngremer nükjidong atalokdaktsütsü meranger sülaba, kechiyong Mathi 28:19-20 nunga shia lir ‘oang aser kin ajak Tsüngrem nütsüng kümdakjang,’ saka asenoki khen jungjunga bilemdangra mezüng ashi ama missionji Tsüngrem meyong aser Arogoji Tsüngremer mission nung teyarisemertem ka dang (Church is not the sender but just a participant in the mission of God because mission is the activity of God-‘Missio Dei’), Arogo aliba agi mission alir masü saka mission mapa aliba agi Arogo alir (Church exists because of mission and not mission exists because of Church).
Talang nung alibapurji-a tongtipang aser parnok dangi aotsübaji-a asenoki mamadoktsüla saka tamasa ana nung aliba pur koda masür, leni maor, tantsür tambur terepranger maliba pur, yi lar, shiti züngnüaka rongsen maliba nüburtem yaria pi atepzüng kechi jenjang nung lir-ar jungjunga ajishir/reprangshir mission mapaji inyak tajungba masü no! kechiyong missionji sama aliba tanela anir aruba dang masü saka nisung ka pa/la taküm ajungjen (wholeness in life) nung nüji kümdaktsüba, ya tzüra alir nem tachitsü aser tajemtsü agütsüba aser nüji lenmang dangi nisung ka aniba ajakji mission mapa lir aser Tsüngremer taginübaji aji lir! Aser kodang asenoki sarasadema itemji tiptema inyakdir Tsüngremer sentongji angatettsü aser Tsüngrem sentong ataloktsür asütsü.
Anungji asen Arogotemi mission ta asüba ya tapi agi konang aser nüngsang asoshi masü saka khen jungjunga bilemdanga inyakdima.