Arogo aser Mungdang nung tenzükertem atema tebilemdangtsü onük kar

~  L. Kika  Pongener, Aoyimküm, Dimapur.

Tanü asen putu nung Khristar arogo aser mungdang nung tenzükertem, mission wadang balala nung tenzükertem ajak asoshi arogotemi aser arogopur tamangertemi kanga aroka parnok taküm kibong tarutsü tia asoshi bilemdanga maparen karbo teinyaktsü lir amai bilemba kar iba ocet ajanga lemsateper. Alima tashitemetet onsara tejakleni aor asünung tamangertem-a tamang jenjanga iba denji liromedema aiener aser iba tensa ka nung arogo aser mungdang nung toklang tenzükertem ajak tazüngba degree tulu akartemi-ang tenzüktsüsa tensa jagi akhanger,aser arogotem-ia yamala degree tulu akartemji dang bushiteper. Ajisüaka asangwa aiürwa tebenjem mapang tepiyong theological degree tulu bushia zünger külen atura tashi akaba mapang tepiyong arogo & ,mungdang aser mission wadang balala nung tenzüker küm agi tain kümadoker asa tao-i sodi agiba mapang nung tenzükba tepiyong nung gratuity ita ka sen küm shia rizünga yutsüba den khubenba taa tera agütsür yokba dak alaka parnok taküm aser kibong tarutsü tia asoshi teyari lenmang kecha maka,ajakbo saku masüji ,oda karbo tia kaa chirnur semchisemnur tajungtemi yaria anepalua mesür,saka karbo taküm tepiyong Tsüngremer wadang ta kü tebilemba ka iba ocet ajanga lemsateper.
Taküm küm nungi tenzüka Ao Mungdang (ABAM)-i arogo nung ordain ministertem koba arogo ajanga ordain sütsür par arogoi pa/la taküm ali tashi pension amai teyari kar agütsütsü sentong tajung atongteter inyaka aotsü tenzükdagi, ibaji sentong tajung ka atongtetogo ta kanga pelaseta amangba pur ajaki agizüker,aser akok ka asünungbo senotsüji iba dak alia terabo talila agutsütet asübo koda jungla. Ajisüaka arogo aser mungdang nung tenzüker ajakbo ordain minister masütsüa akok, anungji ordain ministertem asoshi tang masü, saka toklang tenzüker ka kodang sodir agir anendir arishi tepiyong oda pension amai teyari terarabo agutsütsüsa arogotem aser mungdangi küm shia senotsü taruba nungi percentage kar agiteta bank nung scheme kar tenüng jateter Fund ka tenzüka toktsü nung jungdisu ta bilemer. Aser iba sentongji arogo shia pei pei sasep nung mesüi mungdang resolution ka ama pangzüng küma lemteter itashia/kümshia arogotem ajaki percentage ka agiteter ABAM ajanga ketdangsüa inyak nungang tajungba asütsü ama bilemer.
Tanü asen putu nung takar aser sensaker ajak peipei sasep talitsü kangasa tasak kümadokogo, ajisüaka sorkar wadang nung tenzükertembo tuluba nungi shir tilatiba tashi pension terarabo angur,aser pension menguaka retirement asüba mapang nung teyari karbosa agutsütsü,saka Tsüngrem-er wadang nung tenzükertem-bo yamala lenmang kecha maka. Anungji talisa arogotemi mission mapa awaa oa inyaktsübaji-a tongtipang, arogo terenlok mapa nungdakba kiojen,gari alitsü itemla ajakji alima putu den liromedema aotsübaji-a tongtipang,saka ano iba denji senotsü taruba nungi shilem terara agiteta toklang tenzükertem asoshi pension scheme ka lenmang lapoka toktsütsübajia kangasa tongtipang mapa ka aser inyakdi ta mulongtetra takoktsü lenmang lir ta reprangteter.
Arogo aser mungdang nung tenzükertem asüyonga alima nung alir asünung pei kibong khuret,tsürabur adianu sosem khuret lir, aser achi-ajemba aben – suoshi libaliro ajunga alima putu tensa den liromedema aotsü nungdaker,ajioda meshitetba tebilemtsü khuret aika tang lir. Arogo nung nütsüng nübor ajaki pastor-i anir toklang tenzükertem ajak degree tulu akaba nübo tajung aginür,tzüla-ola tajung,kenten-menü tajung,o nung tsüngro tasong, sempet tajung aketba tenzüker aginür,saka parnoka mimchir asünung nisung ka dak sempet tajung ajak keterbo mangutsü südi,aser meimchirsa asünung tashimaita karbo alitsü. Ajisüaka arogotem nung amangba purtem ajaki mapa tajungtembo ajak nembanga toktsür metokmeperi tashimait kisüng nung rangloker tuteta nüngsen dang jembir aser oda parnok tashimait metokmeperi-ji tang züngshijen züngshir, ajioda asenok tamangertem-a ibala anema bilemba, nemnemba,tashimait nung tang rangloker tai apuba item ajak ya Tsüngrem tsüngdang sentsüh tulu lir. Anungji joko alima tejakleni aoba den liromedema akhi putu nung yamai dang lia aruji, yamai tangsa memelenshi alitsü ta mesüi Tsüngremer wadang nung toklang tenzükertemjia terabo jenjang junga ayutsü lenmang bushitsü mapang tongja tongogo,ajioda mesüra tarutsü lanur putu nungbo Tsüngremer mapa nung tenzükner shinga malitsü südi ta kanga tang tongtipang amai bilemba kar iba ocet ajanga lemsateper.