Arogo balala nem sen agütsüba ya sübokrem masü: BJP

Shillong, Tsüklai 1 (Agencies): Rasemnü osangbenertem den sensaksemba mapang nung state BJP puri AICC tir, Rahul Gandhi-i Bharatiya Janata Party puri Meghalaya nung Arogo balala nem sen agütsür aser nüburtem alizüktsü meranger ta ashiba atema Meghalaya nung aliba nüburtem dang tatok meshitsü asoshi khangogo.
Kasa senden nung BJP state tir Shibun Lyngdoh-i ashiba agi, “Meghalaya nung aliba nüburtem ya ayoktsüba atema masü, onoki vote aliba aser ayokba nung mamanger.”
Iba osangbenertem den sensaksemba senden ya Rahul Gandhi-i sangtennü yimjung atema kentenba sentong ka nung BJP pur aija, parnoki nüburtem aser Meghalaya nung Arogo balala nem sen agütsür, ta ashiba olen jangjashitsütsü asoshi ayongzüka aka.
Meghalaya nung Congress-i aniba sorkar-i kecha minyaker saka nüngshi long dang azüngjen azünger, ta aija Lyngdoh-i ashiba agi, 2013 küm election magi tsüngda 2012 küm sorkari Medical College ka yanglutsüba atema nüngshilong ka azüng aser kasa medical college atema sorkari tawa nüngshilong ka azüngogo.
Maneni Shibun-i ken o mangajemi aliba angajemdakja ashiba agi, Centre sorkari Meghalaya nung Swadesh Darshan scheme kübok Arogo tem atema dang masü saka tamangba yimsü balala atema scheme balala agütsüogo, aser iba ya tekülemdak balala nüburtem puatsüsa yanglushitsüba atema lir.
Paisa ano iba scheme kübok sen agütsüba ya Arogo balala dak agizüktsüba aser magizüktsüba keta lir, anungji iba ya sübokrem agütsüba ama kodanga mezüngshitsüla, ta ashi.