Arogo lenirtemi tonga oa yaritsüla: Rev. Dr. Keyho

Kohima, Nov 17 (TYO): Akhidangbo Arogoi HIV aser AIDS agi shirangba ya Tsüngremi atakatemba mapa ka amato Arogoi bilema liasü saka tanübo iba tangatetba melenshir Arogoi item item ama tashidak agi shirangertem tonga oagi meima anepalutsü tenzükogo, ta Nagaland Baptist Church Council (NBCC) General Secretary, Rev. Dr. Z Keyho-i metetdaktsü.
Pai iba o ya tanü yangi NBCC Platinum Hall nung Kripa Foundation, Nagaland State AIDS Control Society, NBCC aser Family Health International- FHI360 nungertem külemi longjemer Arogo lenirtem den HIV & AIDS agi timtemba tebilemtsütem indang shisalemsateptsü asoshi ayongzükba sentong nung jembia liasü.
Rev. Dr. Keyho-isa ashiba agi, Arogo dak aketba jakla kaji ibai tekümzüker telok ka lir aser ibaji Arogo nung kümzüka alirtem asoshi dang masü saka alanga aser yirua alirtem aser shirnok Arogo nung meliaka timtema lir, parnokji temeim agi anepalua kümzüktsüba mapatem lir.
Iba tangatetba nung tanü putu nung Arogotemi tenla kidang dang masü saka timtemba purtem tonga oagi Tsüngrem temeim aser taochi lemsatepa yariteptsüla ta paisa metetdaktsü.
Arogo nung sannüker aser tenzükertemi mozü mora achir, yi ajemer aser HIV/AIDS agi shirangertem ya asenok rongnung teyari kanga nüngdakba purtem ta angateta tonga oagi yatitsüla ta paisa ashi.
“Asenoki asen Arogo nung alirtem dang masü saka tangartema yaritettsüsa apu yanglutsüla. Arogo nung tenzükertemi pei dak aliba tashimait shitettsüla, aji asünung dang asenoki tashimaitertem temeim aser taremzük agi tonga oagi yaritsü angazüktsü, ta paisa ashi.
Iba kasa sentong nung Dr. Joyce Angami aser FHI360 nungi Dr. Rose Chakhesang natia jembidang, arogoi ano maneni Nagaland State AIDS Control Society aser parnoki HIV nokdangtsü merangba mapa nung yaridaktsüner ta mepishia metetdaktsü.