Arogo nung “Deacon Board” nungja ya melentsübilemdang nung koda ? ta asuba ocet nung O-semlok

~  L. Kika Pongener.

October 6 & 7 2018, Tir Yimyim Olemsabang nung, Lennir Tiatoshi Longkümer, Pai züluba ocet, Arogo nung ‘Deacon Board’ ta amshiba nüngja ya tanga kati melentsü bilemdang nung koda ? ta züluba ocet azüngdang, hau, iba onük nung ya shisadangtsüla ka lir… ta bilema züngogo. Ni laishir lai poti meteter ka masü, anungji Doctrinal ratet-yim nungi masü, saka kü tamang tangatetba aser ajangshiba nungi olen kar lemsatepnür.
Tanü Naga nunger arogotem nung, arogo nung lennir aser tongti-tenzükertemi yimten yimsüsüba yayim nung arogo anitsü merangdang, arogo aika Khristar arogo memesük, alima yimten inyakyim den kecha tepila mali mezü-pelanger, Khristar arogo aika nung Khrista jakla mekai küma-odagi. Yisu Khrista sür shia arur kodaki tur külen, pai nangzükba ama tenem-nü benjong (Pentecost day) anogo nung nütsüngtem külemi temaba takdang nung sarasadema lia, Tanela Temeshi alua parnok shia dak amenlok, aser nütsüngtem Tanela Temeshi agi sünga oshi balala agi jembimeso, aser Peter-i anir nütsüngtemi Yisu indang tasü ita sayutsüngitsü tenzük, aser panüji nisung merijang asem shi temulung meyiper tzü nung baptia parnok den zünglok (T.Mapa-2:1-4 & 37- 42). Iba anogo nungji Yirusalem nung mezüng arogo-ji tenzük. Ajiser, parnok oset ajak arok meyong kümer kenü-a mati ka küma longjemer sasarasadema liasü. Aji oda, item anogo nung arogo nung nütsüng yongsük tali-tali renloka ao, aser Greek o jembiba Yihuda-puri, Ibri o jembiba Yihuda-pur tenüng sena-adok, kechiaser parnok amitsürtem anogoshia chiyungtsü anganüba agi mata. Aser nütsüng ter-ana jagi (Yihuda Iskariot melena Mathia züngsemer… T.Mapa-1:23-26. nung züngra angutsü) telokji parnok dangi jatep aser ashi, “Asenoki chiyungtsü anganütsü asoshi Tsüngrem o sayuba sentoktsü tim masü”. Anungji adianutem, nenok rongnungi tenüng tajung akaba aser Tanela agi asüngba, shisa taka nisung tenet shimtetang, aser iba rongdak mapa reprangtsü asoshi parnok nem nungloktsüdi. Saka onokbo sarasademba aser Tsüngrem Osangtajung sayuba nung bendanga agütsütsü. Anungji parnoki tenüng tajung akaba aser Tanela agi asüngba nisung tenet-ji, Stefan, Filip, Prokora, Nikanor, Timon, Parmena aser Antiok nunger Nikola parnokji shimtet (T.Mapa-6:1-5).
Asenoki Deacon tenet shimba ya kechi nükjidong nung shimtet ta laishiba nungji jungjunga züngdangra, “Chiyungtsü anganüba nung nüngsen-bangsen madokdaktsüi tim-i ketdangsüa acha-ayangtsüba” atema… aser “Tenyartem sarasademba aser Tsüngrem Osangtajung sayuba nung tetsükdaktsü maludaktsüi sadem-sadema inyaktsü asoshi nungita yariteptsü asoshi shimtet”… ta laishiba nungjagi tejangja rajema angateter. Tetezü, chiyungtsü anganüba mapaji Deacon tenet jagi inyaktsü aser sarasademba aser Tsüngrem o sayuba mapaji Tenyartem jagi inyaktsü…. ta bendanga angateter. Asenoki tali rajema angatettsü atema ano lai tekongji khen meyipa züngdangdi. “Anungji adianutem, nenok rongnungi tenüng tajung akaba aser Tanela agi asüngba shisa taka nisung tenet shimtetang, aser iba rongdak mapa (Chiyungtsü anganüba mapa) reprangtsü asoshi parnok nem (Deacon tenet nem-ji) nungloktsüdi. Saka onokbo (Tenyartem-jibo) sarasademba aser Tsüngrem Osangtajung sayuba nung bendanga agütsütsü” (T.Mapa-6:3-4). Iba nungjagi asenoki Tenyar-tem aser Deacon-tem mapa tepila-ji tejangja angateter.
Tanü arogotem tia reprangdangra, arogo kar nungbo Full time tenzükertem aser Deacon menden tsüngda, arogo sentong aser inyakyim aika nung tatsütep aser mebenteti aliba angutsü. Ano kanga-sa tesasatsü kaji, yimten yimsüsüba ‘Putu Menden’ aser ‘Deacon Menden’ anaji kasa ta tangatetba nung, arogo anir aotsü merangba ajanga arogo-ji alima lokti tentet ka mesüka (Liberal) küma odagi. Ajisüaka, yimten yimsüsüba ‘Putu Menden’-ji sobaliba temzüng-ozüng telatet agi mekabanger anir, saka arogo yabo yamaji masü, arogo nung ‘Tekolak aser Kibur’-ji Yisu Khrista, aser Laishiba tesayuba tiyongtsü südaktsür dang arogo-ji anir. Hau, alima asünungji, nisunger libaliroyim kar-kar nungbo liromedema aotsü asoshi “Inyakyim Tetuyuba” (Guide-Line) ka renema yur, iba nungji ajemdaker arogo-ji anir, saka iba “Guide-Line”-jia Laishiba tesayuba nung dang amendaker yanglur. Ano arogo kar nungbo Deacon Board majangi Sannüker-i anir toklang tenzüker-temi arogo sentong kecha sadem-sadema meinyaktetba, talisa Tanelar wadang-a dena sadem-sadema meinyaktetba-a angutsü. Ano arogo kar nungbo Deacon-tem rongnungi ‘Deacon Board’ Chairman & Secretary ta shimer inyakba angutsü.
Aji oda, toklang tenzükertem den yaritepa nungita inyaktsü tangatetba nung shimer inyaker asütsü südi, saka jungjunga shisadangra arogo ka nung kodang tekolak aika südir mapang kar nungbo, maparen aser inyakyim kar nungbo tatsütep aser tsükteptsüsa (Clash) adoktsü. Ano tanü putu nung, arogo aika nung, sorkar mapa nung Officers Pension ngur alirtem Deacon shimmer tenzükba ajanga arogo terenlok maparen lenmang aisü nung tajangzük aika angur, saka ano kanga tesasatsüka, tenzüker karibo ‘Govt. Office Procedure’ yayim nung arogo anir aotsü merangba ajanga, arogo sentong aser inyakyim kar nung timtem tetsükdaktsü ajuruba-a arogo kar nungbo alitsü akok, kechiyong arogo inyakyim-ji sorkar inyakyim den khenyongi tepila lir. Ano yimdak yimtsüng kar nungbo, arogo-ji yimten küpok, yimten-ji arogo dang tambu, iba tangatetba nungji yimten-i arogo nung teka amuoka, arogo madak tashi amshiba-a alitsü akok. Saka arogo ka anitsübaji laishiba-i kechi tuyur ? Tsüngremi mulungba kechi ? ta asüba nung dang rangloker maparen ajak inyaktsüla. Laishiba tesayuba nungi pila-a arogo sentong kecha meinyaktsüla. Arogo nung Yisu Khrista ‘Kibur aser Tekolak’, Pa dak alaka tanga lokti aser tenzüker shinga ‘Kibur aser Tekolak’ masü. Anungji arogo nung tenzüker ajungai arogo nung kibur aser tekolak-ji Yisu Khrista-a ta angateta ayutsüla aser iba tangatetba nungji tenzüktsüla.
Hau, arogo nung tenzükertem ajunga-ji tongti-tenzüker ka-ka lir, aser ajaki khristar arogo tashi-itdaktsütsü atema pei pei shilem inyaker. Aji oda, temalen shisemba ama kodang “Deacon Board” ta sudir, nungja dakji tashi (Authority) dena alinungji, iba nungja-yim jagi atsünga oa inyakdang, memeteti Khristar arogo amaa-doker, yimten yimsüsüba aser tanga lokti-tentet leni atsünga oa tashi amshira, idangji memeteti aibelentsüsa akümer. Yisu-i pa Ministry nung yariteptsü atema shimtetba Peter o Yohan nunger danga ” Nutsüng ” (Disciple) ta aja.
Anungji iba denji mesüktepa ” Deacon” melena “Arogo Nutsüng-sür “mesüra” Arogo Ketdang-sür” ta aja nung tapetba asütsü asü ? aser parnok küpok “Mapang-sür” mesüra “Tim-sür” ta item nüngja-ji sendaktepa lir. Aji oda Deacon Board-ji tashi mekai kümdaktsütsüba nükjidong nung masü, saka arogo nung lenla ajak liromedema tobur junga anitsü tangatetba nung, tenüng tapet tajung ka melena ajaba tajungba südi-sü ta, lennir shibai iba ocet züluogo, pa den-ji semloka kü tamang tangatetba aser ajangshiba nungi olen kar lemsateper.