Arogo nung “Deacon Board” ta Amshiba Nüngja ya Tanga Kati Melentsü Bilemdang nung Koda?

~  Tiatoshi Longkümer, Kohima.

Jili O Rajem Kar:
Iba tebilemba ya arogo aser mungdang nung toklang tenzükertem aser deacon-tem dangi züluba ocet ka lir. Saka ano arogo nung shirnoki temulung agütsüa tenzüka aser arogo asoshi belema alir parnok asoshi-a kesasa dang tongtipang asütsü. Tajungtibajibo iba ocet ya mungdangi adokba tongtepratep shiti kar nung zülu nungang tapetba süla. Saka oda tazünger teimba tongtettsü mechi Tiryimyim nungang iba tebilemba lemsateper. Ni arogo nung toklang tenzüker ka ama, yangi kü tebilemba kar kü shisatsü yari dang zülur. Saka iba ocet azürtemi pei tebilembatem, kesa tebilemba nung mesüra tanga tebilembatem, iba onük nung ajemdaker lemsatep nungbo kanga tajungba asütsü. Paper nung langzütepa zülutepba dak alia ano mungdang aser arogo sendentem nung iba ocet ya tarokba nung belemdanga jembitep nungbo temelenshi tasen arogo nung adoktsü teimla nung iba ocet ya tepoktsür.

Deacon indang Laishiba Nung:
Arogo nung deacon indang tamalen ABAM aser arogo nung tenzüker tajung aikati kaket zülogo. Anungji iba indang ni iba tapak tila nung aika merasar. Temeshi Laishiba nung deacon indang mezüngbuba zülua alibaji Tenyartem Mapa 6 nung angutsü:
“Item anogo nungji kodang nütsüng yongsük renloka ao, Grik o jembiba Yihuda puri Ibri o jembiba Yihuda pur tenung senadok, kechiaser parnok amitsürtem anogoshi chiyongtsü anganüba agi mata. Aser terana jagi nütsüngtem telokji parnok dangi jatep aser ashi, ‘Asenoki chiyongtsü anganütsü asoshi Tsüngrem o sayuba sentoktsü tim masü. Anungji adianutem, nenok rongnungi tenüng tajung akaba aser Tanela agi asüngba, shisa taka nisung tenet shimtetang, aser iba rongdak mapa reprangtsü asenoki parnok nem nungloktsüdi. Saka onokbo sarasademba aser Tsüngrem Osangtajung sayuba nung bendanga agütsütsü.’ Iba o jagi telok ajak peladaktsü, aser Tanela Temshi agi asüngba nisung ka Stefan, aser Filip, Prokora, Nikanor, Timon, Parmena, aser Nikola, Antiok nunger shiba Yihuda yimsui meyipa nisung ka liasü, parnokji shimtet.” (6: 1-5)
Deacon shimba mezüng nükjidongji tenyartem kibuba langbang nung yaritsü aser maka maiter dang temeim mapa inyaktsü atema liasü. Atangji, deacon ta asübaji Greek oshi nung “diakonos” nungi adokba lir, koba tetezü “kilir.” Tenüng agütsüba ama, arogo nung deacon shimbaji tenyar/sannükertem kübok arogo kilir mapa inyaktsü asoshi shim ta angateter. Aser iba tangatetba nung Tasen Lai kakettem nung deacon ta asüba tenungji 34ben tashi tetshia angutsü. Temalen agüjaa aliba lai T. Mapa 6: 3 aser 1 Timoti 3: 8-13 nung deacon shimtsü jakla-liro (qualifications) indang shia angutsü: tenüng tajung akaba, Tanela agi asüngba, shisa taka, temeli ana masü, yi ajemba masü, merumeru masü, mulungsentsü temerük, tamang miim o ametba nisung, tetsür ka dang agiba, pei chirtem aser kibong jungjunga yimsü sütetba. Ano kinungtsürtema, teshisadangba taküm, tebang azüoka litetba, teyari benshiba aser temulung lemtetba taküm asütsüla ta shia angutsü. Ni amanger Aoli arogotemi tanü tashi item lai tesayuba nung ajemdaker deacontem shimdar.

ABAM aser Deacon Training:
ABAM-i küm aika Ao arogotem area-wise lemsar, deacon training agia arudagi. Lai tesayuba aser shisakartemi zülubatem nung ajemdaker arogo nung deacon ka teinyaktsütem sayur. Iba training sendong nungdaka akümba teraji bushidangra, atangji nung arogo mapa inyakdang pastor aser deacontem tsüngda arogo yimsüsütsü tashi atsütepba nungi adokba lir. Putu aika arogo nung deacontemi aiben yimten yimsüsür jakla yimya benshiba ajanga pastori arogo nükla tajung nung anir moteti deacontem tebilemba nung aiben arogo telemtetba agia inyak. Ano talisa, deacontem shimbaji lai o aser laiputi nung training agir alirtem masü saka arogo ajanga sati khuli agir alirtem dang shim nung deacontemi alima sobaliba metet saka arogo inyakyim aser lai o tangatetba-bo ajema alirtem teimba liasü. Yamala khuret aika ajiteta, ABAM-i lay deacontem küm shi training agütsüa aru. Iba ama training yagi tangatetba tajung aika adokdaktsüaksa, ano kesa tebilemtsü arogo aika nung tanüa lir. Nibo belimer, tom nung training agütsüba kisung masü, saka nükmen nungji lua khen reprangshitsüla. Aser iba nükmenji “Deacon Board”ta amshiba nüngja ya ministry tangatetba len nungi tenüng tapetba ka magütsü tashi anosa timtim alitsü ta belemer.

Deacon Board Nüngja Reprangshiba:
Arogo otsü shisadangertemi ashiba agi, lai tesayuba nung aliba arogoren nungi pilaa oa yimtenren yimya nung arogo aoba mapangji 18th century tatemlen nungi tenzük. Item indang teshisadanger Howard Foshee ashiba agi kodang arogo nung deacon mapaji “tenzüker kilir” tangatetba nungi pilar “board” ta tangatetba amshi iba nung jagi tenzüka inyakyim balaka melenshia oadok. Foshee-isa ashiba agi, arogo ka lai tesayuba arogo yimya nungi pilar board yimya tangatetba yim nung dang aoba metettsü asoshi tuodangba asem pai yamai agütsü:
1. Kodang arogo nung tongtipang committee-temi bener aruba ajak deacontemi tatembang telemtetba agia arogo general meeting dangi yokdir, iba arogoji board yimya nung aoba arogo ka lir.
2. Kodang pastori anir toklang tenzüker ajak arogo yinti dang masü saka deacon temelaba nung dang lidir iba arogoji board yimya nung aliba arogo ka lir.
3. Kodang arogo nung nüngdak amshiba rongsenketzüng ajakji deacon temelaba nung dang amshidir, iba arogoji board yimya nung aliba arogo lir.
(Howard B. Foshee, The Ministry of the Deacons, Broadman press,1968)
Ano Foshee-i züluba kaket Now That You are a Deacon (1975) nung yamai ashi, “Board of deacons ta Baptist arogo nung amshi tenzükba ya kanga tia maka inyakyim ka arogoi aitba lir. Iba ojang ya Baptist-temi Tanela Temshi lenisüba nung külemi longjemer inyakba yimya den kheni meputep. Baptist arogo ka nung yinti telemtetba agir aser züngsem shiai Kibuba Khrista lenisüba nung ajemdaker pei tangatetba nung meyong nem (vote) telemtetba agir.” (p. 13).
Ano Jerry Songer ashir, board ta asüba ojang ya business/shishilembar ojang lir. Laishiba nungbo “arogoji Khrista temang” ta dang shia lir. Anungji the board of deacons aser business manager tangatetba shisatsütem ya arogo asoshi tapet ojang masü. (Jerry Songer, “Deacon Leading with Pastor and Staff” in Deacons as Leaders, compiled by Robert Sheffield, convention press, 1991, p. 87)
Howard Foshee aser Jerry Songer-i ashibatemji bilemdangra, baptist arogo nung deacon aser board na longjemer deacon board ta ajaba nungji lai tesayuba (biblical model) nungi pilaba dang masü saka practical inyakyim aika nung tetsükdaktsü lir. Tebilemtsü tulutibaji, deacon board ta ajaba nüngja kübokji deacontem dang masü, arogo sannüker-i anir toklang tenzüker aika dena lir, aser item members ajakji meyokteper deacon board ta asenoki amshir. Kodang arogo pastor-ji deacon board ta ajaba telok nungji member ka mesüra mendenbuba sür tendir, nüngja amshiba yim nungjibo pastorbajia deacon kübokji ang inyaker. Ano kodang deacon board nungji deacon board chairman aser secretary-ji deacontem rongnungi shima amshidir, pastorbaji deacontem kübokji member ka dang akümer. Kechiaser pa “deacon board” nung deacon masüba züngsem ka dang lir.
Tanabuba khuretji, kodang “board” ta asüba lenji kanga atsünga amshidir, joko deacontemi tenzükba wadang (arogo ministry) dang nungibo arogo yimsüsübaren (church administration) ang tali temulung agütsür. Aser yamaji, parnoki parnok sasa arogo yimsüsürtem ama bilema pastor aser toklang tenzükertem parnok kübok yunür.
Atangji, deacontem trainingsa agütsüakasa, nükmen nüngja-koja nungji tebilemtsü ali tashi lai tesayuba nungi memeteti piladoktsü takoktsü lir. Anungji, tang Ao arogotem aika nung deacon board ta amshia aliba ya arogo ministry tsütsü ka atsünga tenüng ya melena ajaba tajungba asütsü ta nibo kang ronga belemer. Tatishitsü agi, “Arogo tenzüker menden,” “Church Ministry Team,” “Arogo timsür committee” etc, yamala mesükba tapet tenüng ka agütsü nungbo kanga tajungba süla.

O Tembang:
Karibo bilemtsü, tenüng ka nungji kechi khuret ali ta bilemya alitsü akok. Inyakyimji dang yanglushirbo nüngja atemajibo kecha masü ta bilemera lir. Saka tenüng aser nüngja-koja nungjidang ajak sendaka lir. Yisu tenüng nungji dang asenok khristan tamangba tashi-ain aser inyakyim ajak sendaka lir. Yamaji arogo nung kechi nüngja-koja amshidir iba yimya nungji inyakyim aser tangatetba ajakji arutsü. Memenui asenok ajaki iba “deacon board” nüngja ya khen shisadangtepa langzütepdi.