Arogo School tamakok ajuruba

– M. Meren, Ex- Pastor, Ungma.

(Yashi adok nungi…)
Tanü Ao Arogotemi lanur, lanur, lanur ta kanga dang temulung agütsür saka Arogoi hapta ka nung Deobar nü gondha ka lanur anitenba agibo lanurji Arogoi bilemba amaba madoktettsü, kechaser alima tatsübaji ulura kümogo. Asenoki bendang limai lanur Missionary yoknüyonga sempet aketba lanur mezüngtetra theology züngogo ta ser pi bendang limai Missionary koda yokla ? Theology nung nisung 100 renem nung idakji tagitsü nisung 10 dang adoktsü nung koda ? Asen Aori pi bendang lima, China lima nung, Bhutan lima nung, Nepali lima nung Mission mapa tulu inyaka Field lapoka Tsüngremi mulungba ama inyakdi ta asüyongbo Ao lima Arogo süadokra kechi nungi Mission wadangji inyaktettsü? Kechaser Ao Arogo ya alima temetetba aser rongsen nungbo petinu lima tashi kumdagi saka tanüla tsütsübo kanga ladakladaka kumaogo, aser asenoki nümadanga tangatetbabo mali ser nung pi lima nungbo School lapoktsür, studentsü angati sponsorship tajung bushija züngdaktsür, pi limabo tenük lapoktsür saka pei lima pei Arogo nung Arogo School lapokba nungbo Arogoi students dak nungi Arogo tajangzük bushir? Pei yimtsüng nung kanga dang tepetzük kibong aika liaka parnok asoshibo sponsorship mebushitsür aser pei lima sensaker dang nungi pi lima alir students yaritsü tejangraba aser iba jiang Tsüngrem mapa ama bilemer ta aka nung Ao Arogo School nungi tangar dang nungi koda ser balaka tajungba züngtettsü ?
Anungji tanü Ao Arogoi Lanurtem dak tenük yoker süra Ao Arogo shiai Arogo School kaka lapokang aser aji Home Mission School kümdakjang aser School nung jagi Arogoi tajangzük tebushi saka küm nung Arogoi Home Mission School dakji Lakh kwi endoktsü ta lemtepang aser tangar School tajung nung Staff ita sen dak tajungba agüjang, aser kenyongi training tajung akaba tesayur yuang, aser iba school nungji tanüla tangatet tazünger Chaplin ka yuang aser bendanga agütsüba Youth Director ka yuang aser lanurtem nemji kenyongi tanüla chiyungtsü balaka anogo shia agüjang. Küm 10 tsüngda nung Arogoi lanur tsütsü tajangzük asadangang aser tangar School den metemdangang ? Arogoi idangji metettsü.
Tanü alima nung study südangang, School tajung nung takar tulur chirtem dang züngteter saka asen bangertem Sorkar Primary School nung dang azünger, Sorkar mapa tajung ka adok nung tulur takar chirtem dang iteter saka asen bangertem interview 10 bena agütsüyonga madoker , kechiaser School tajung nung azüngba masüji makoker. Yimdaklirtem ayatai; kecha nunga sensaker atongokdak makatsü, anungji yimdaklir chirtem School tajung nung mezüngteter, interview kecha nunga matoker, sepoy nunga magili ta ashir, kechiaser teyarir mali, anungji lanur timba ka yi jema, mozü chia das asayadak mapang endokba nung dang pelaa alir, kechaser tanü Ao Arogoi lanur dak temolung agütsür tabo jembir saka Deobar nü gondha ka Y/D ajanga ashiakümba kisüng jagi tanü lanur temulung masür. Ao Arogotemi pi bendang limabo sensaker tanurtem anitena teyari teperi agüja mesür saka pei lima sensaker chirtembo, pi memenep, züngner saka teyari maka, anungji jashia hajira bushia senzütsü aser iba sen jagi yi, mozü alia chia taküm jendi samaogo, memenui asen lima generation gap adoktsü ta asüba to ataloktsü, tashikar atura nisungtem timba leperi omadagi aser amitsür agi alima sünga kümdagi, anungji generation gapji atoktsü. Anungji Arogoi pei yimtsüng shia nung Home Mission School kaka lapoka o agi masü saka mapa agi Home Missionji kümdaktsütsüla. Ao Arogotemi Home Mission inyaker aser aji yimtsüng nung mekokminertem yarir, shiranger semdanger, hau aji junger saka ibaji Mission mapaji masü, itemjibo Arogo teinyaktsü wadang nung aketba tim maparen ka dang lir saka aji project ka masü. India PM pai aiben paper nung India nung sensaker ajungkettsütsü ta teti pa sentongji lir. süra Arogoia koda? Takar chirtem, tulur chirtem tajung akümba agi Aoli Arogo temulung sür alitsü asü asen yimdaklir sensaker chirtema parnokji menepba kümdaktsütsü aji shir mapa asütsü ? Anungji Arogoi Home Mission Schoolji Project tulu ka yanglutsüla.
1892-1960 meta tashi Arogoi alima
Purtem amangsepdaktsütsü nükjidong liasü aser yamaji inyaktet, 1960-2000. Iba tsüngta ya Arogo asentenshi putu ka meshiba ama Aoli ajunga asentenshi putu ka ajurua iba jagi Naga lima süngdaktsüogo. Saka tanü 2000-2016 tashi nung Arogo ya Laodikia Arogo putu ir, telembet putu, Yisui ashi Ni takar, rongsen nguogo, aser ni kecha tanüngtsü maka ta nai ashi nung na tia timtemba, tekangshiba, aser sensaker aser tenük tapok aser mangsa ta shai aliba bilemtetdi. Ibaji tanü arogotem dang ashiba lir. alima tangutsü nungbo Arogo takar temeja sentsüwangshia yangertetogo, ni kari jembia angazük, aya par Arogo Pastorba office-bo England chuba menden ama sentsüwangshia latetogo, asenbo tekao majungtsüsa kanga merena yanglua lir ta jembia angazük, hau aji kecha tamajung mali saka tanüla tsütsü Santem tiabo reprangdangang, Govt. Office ajak oda department ajunga nung adjustment adjustment, Arogo office tashi nung adjustment, department ajunga nung bushitsüngdangtsüla ta paper timba ka nung adokbaji ochibosa malitsü, süra idakji kong ochi lir? nüktapangtar temeja, kinungtsü ana asem yua lir sak Arogo nungbo member tajung. Hau südito ? Angazükba agi, kinungtsü kar tangar den senzüba ajanga o putep, saka jembia jembia kinungtsü jagi ashi, osetji kü indang nungji aji kü mulung ta ashiba otsü ka lir, tanü iba tia nungji Arogo purtemji lir. Dokan ajak nung condom free ayubaji shir atema? Arogo purtem atema lir, hau südi? Yyi meseper temeja, yi ayoker temeja, hau südi? aser ajakji Arogo member temeja, ano sen sayar temaja, baki marir temeja, kilalular temeja, moko sali agi alima tasüng, sali metsü agi alima ajak tesempatsü masü no ? akhidang tsürabur Arogo yamai liasü asü ? Süra tanü Arogo o akhidang Arogo naji koba shidakba ?
Anungji item ajak nungi jenbutsü aser lanu putu tasen ka alima nung yangertsü asoshi Lanur Home Mission ka Arogo School nung tenzükang, iba sülenji putu tasen ka alimai arutsü. German nunger Adolf Hitleri Berlin yimti nung World War I mapang ali telong nung city ka yanglu aser iba nungji lanur meyirijang aika pudena mesü aser iba kiküm nungji Second World ta zülua liasü, tetezü pai tarutsü lanu putu tasen ka lanurtemji ajanga yangertsü asoshi inyakba liasü. Anungji tanü lima ya tang ajungbena meyanglutettsü saka lanur nungi tenzüktsü aser aji Arogo Home Mission School shidakba nung yangerba ajanga tarutsü putu nüklaji adoktsü aser ibaji Arogoi iba nungji sen jenti indokang saka tajangzük tebushi ta ayongzüker.