Arogo School tamakok ajuruba

– M. Meren, Ex- Pastor, Ungma.

Asen Naga lima nung mezüngbuba ABC angazük tenzükbaji 1878 küm Mrs. Dr. Clarki Molungyimsen nung Ao Primary sayuba nungi Aor shisaliok bushitsü tenzük aser tanü tashi nung küm 138 shi dang lir. Iba sülen 1895 küm Naga nunger ajunga asoshi shisaliok reju ka training school ta ser Impur nung lapoka tenzük, anungji Naga nunger training school lapoker tanü tashi nung küm 121 shi dang lir. Anungji Naga lima oda Ao lima nung shisaliok ya kanga kara aiener ta reprangteter aser iba amaisa aien nungbo tangbo joko kanga talangka iner alitsüba liasü, oda England Americasa memenepyonga, kechiser parnokbo asen limai osang tajung arutsü ano pongmang asüdang oda Dr. Clark nunger masodang par lima nungbo 16 aser 17 century nung joko Doctor agi alima sünger, Theologian agi alima sünger aliba putu liasü. Saka asen Aortema tangbo joko kanga talangka orr alitsüba ser nung 1954 meta nungi Naga lima nung shisaliok lapoka akaba ajak shibangja, tazüngertem tepsettsü tashi ozüng agüja aruba ajanga lanur jenti joko züngnüseta item ajakji Naga army inyaktsü asoshi aremi paoka ai aser kar kar jena oa pei bendang lima azüng, ishika züngtetbaji parnokji liasü. Aser joko asen Ao lima school ajak shibanga yutsür mangrang punga aküm. Oda school shibangbaji dang masü saka Naga lima yim ajunga, tsük jen ajunga oda Naga nunger rongsen ajunga auyi aküm. India armytemi khen rongtsüli ano Naga nungeria karbo rongtsüli ta melentepa yim ajak rongdok kar yimbo asembena arong. Ibai asen Naga nunger tangatetba shisa tatsü ajanga asen Naga nungersa aoksa aküm. Yamaji ki khen rongdoktsübaji dang masü saka shisaliok nung tenokdangba tulu ajurua school ajak shibangtsü. Ibaji apibo tang asen Aor shisaliok nung tejakleni aoba ya kanga dang karaa aiener ka reprangteter.
Saka tanü alima tia repranga arunung, onok tamburi mangdang nung angubaji asen lima memenui generation gap ka adoktsü ta penzüteter. Education nung masü saka nübortem tsüngda nung adoktsü, kechiser tanü lima nung akaba shisaliok kecha nunga tanüla chiyongtsü mangur (spiritual fooding) saka alima temetetbabo pei tashi temeteter menepba aiener, saka tanüla tazüokbabo kenyongi maka, anungji lanurtemi Tsüngrem mali ta züngteter aser tekülemdaki maor, saka party tapu balala ajak nung tetsü-tebung apangteper shi azü pelatepa nung anogo ka nungi ka ta omadaktsür, aser temesepba chiyongtsü agi nisung ajunga yiar küma omar, item aiür-asangur den kidong tanubor koba taküm nung towartem mapang, tashikadang ajunga leperi omadagi. Tanü tasürtem asadang nung nisung 10 asüba rongnung arishi küm agi tonger asür 4 aser tashikadang towartem mapang asür 6 ta adoker aser lokti ka nung oda party ka nung iba jagi tetsür 10 aru nung item rongnungji 6 bo amitsür tajung dang, kinungboi toktsür aortem adoker. Item kibongtem nungji tanur ka mesüra ana tetsü nem moruloka yutsür leperi omaba purtemji temeimtsüka masü no ? Aji oda, lanur noklang ka adenshi nung 30 mesüra 40 bo tebu malirtem adoker, tawa küm 11 tanur kati nibo kübua mali aser kütsüi ni toktsür tebur tasen bushia oa adok, anungji nibo alima nung tali malang, anungji tasü dang süner ta jembiasa aru, anunghji adianutemi aiben mesüzükasa lia aru, saka iba terongjen jagi pasasa asüba atalokogoto ?
Küm ishika jakdang nungi ABAM-i pi bendang lima mission mapa tulu inyaker aser iba mission nungji Education department tajung lapokja, Master teperi taa agüja students aika sponser bushija angati züngdakja mission mapa inyaker aser iba denji Development tulu agüja joko tanü tashi nungbo kanga takok nung tejakleni oya alitsü imlar.
Yamaji ana ABAM-i ajungshia Local Arogotemia tanüla wadangji ngua Arogo aikati pi bendang lima mission mapa tulu inyaka arudagi,talisa ngua aruba agi Kohima Ao Arogoibo Arunachal nung Barigon Town nung School tajung lapokja Master teperi den School Building, Hostel teperi, Master quarter teperi yangluja Development tulu agüja tesüngmangtsü sen jendi entoka yariba ngua aruogo, iba dak alaka ano aika nung yamaji yaria alitsü südi. Ni tatishitsü ka ashirba dangashi yamaji Local Arogotem tulubaia tuluba yari aser tilaia tila yari pi bendang lima nung Education Missionary taa teperi agüja yaridagi, karibo Mission field tulu lapoker Education department tashi sen jendi inokja mission mapa tulu inyakdagi, yamaji Arogoi pei dak item ajakji süloka punger oya alitsü südi, ajakji Tsüngremer wadang aser aji teinyakeri moa aser Kibubai molungbaji itemji lir.
Yarnaji küm ishika jakdang nungi Ao Arogotcm aikati pei yimtsüng nung Arogo School shisaliok riju kaka lapoka aruba ataloka aruogo. Saka küm ishika amshia arur joko tajangzük malia ta ser ano karbo Arogoi makoker ta ser anenadokba angur aser karbo tasüa masü taküma masü ta akatsü sudi.
Aoli nung shisaliok ya mezüngbuba Arogoi lapoka bener aruba ajanga Aoli nung oda Nagalima ajak nung tashi temeteter jendi adoka alima lenir züngtetdaktsüogo ascr anüdoklen lima kenyongi tammang tia nung aliba purtem nüji kümdaktsübaji Impur nung azüngertemji lir. Parnokji Theology aser Biblc School nung mazüng kechiaser idangji itemji maliasü, saka Primary School azüngba oda Class VI tashi zünger tammang lima alirtem ajak nüchi kümdaktsü. Oda anüdoklen alirtem dang masü saka asen Ao lima amangsepdaktsübaji Impur training School nung Class VI tashi azüngertemji lir. 1895 Impur nung lapokbaji alima Education dang masü saka Tanüla chiyungtsü (spiritual feeding) agütsüba agi idak nung jagi adokertemi Naga lima yangerteta yutsü. Shidakba nung Mission mapa inyakteta yamaji lia aru, saka tanü alimai agütsüba Educationji secular education dak alaka Tanüla chiyungtsü magütsür ta angateta Arogotemi Arogo School lapokyonga ao aser tsürabur mapang ama Arogoi lapokba nungji alima temetetba dang masü saka tanüla chiyungtsü peria agüja lanur züngtetdaktsütsü tebilemba liasü saka tebang agi jembia bilemba ama Arogotemi mapa agi meinyaktetba ajanga tamakok nung atemer.
AROGO SCHOOL TAMAKOK AJURUBA KULI KAR
1. Arogoi Lapokba Schoolji Home Mission ta mangatet aser nükjidong maka saka tangar jilo benshia alima dak dang rangloker lapokba agi asür.
2. Arogoi lapokba Schoolji Arogo Income asoshi lapok (Arogo sen tarulen asoshi bilema lapokba) ibaji ajanga asür.
3. Arogo Schoolji Mastertem nem nungloka yutsür Arogoi kenüa mesemdang, majungshiba (support masü) ajanga asür.
4. Arogo School nung students saruba (fee) tangar den saku tasak Educationbo tangar memenep, iba jagi tazünger maruba ajanga asüba.
5. Staff ajungai Arogo nükjidongji mangatet aser bendanga agütsüba tesayur kata mali aser yimya School ama dang bener aoba agi asü.
6. Arogo school nung azüngera kecha balaka matoker kechaser tanga school den kasa dang bener aoba ajanga tazünger mali akümer.
7. Arogoi tesayurtemji qualification tajung meyutetba ajanga tanger memeneper aser aji Arogoi ita sen tajung magütsütetba ajanga tajungtemi marur. Ano shiti süra tashi maitji aika lir.
Shiti süra alimai tesem ajak nung School tajung paikadi lapoka yur kasaji kechi atema Arogoia lapoker? Doughlas School ama, Queen Mary School ama, Mount Garmel School ama, Delhi Public School ama, St. John School ama, Little Flower School ama, yamaji takartemi School tajung jendi lapoka yur kechiba Arogoi Arogo rongsen jendi endoka tangari lapokba alima School ama kasaji lapoker?
Saka Aoli Arogotemi Arogoi lapoktsüba School nükjidong aA ji mangatet tashi Arogoi lapokba Schoolji asütsübasa.
Tanü lima tia nung alima kelen aser Arogo kelen ta arr atsütepba mapang ka lir aser tanü arogo inyakyim tia nung ali tashi nungbo Arogoi alimaji majettsübasa kechaser alimai anogo nung Gondha 12 tashi lanurtem nem shisa agütsür, saka Arogoi hapta ka nung kenü Deobar nü gondha ka lanurtem anishir. Koda ser akoktsü ?
Alimai ita ka nung Gondha 360 tashi atsür aor, saka Arogoi ita ka nung Gondha 4 dang anishiteter, koda ser akoktsüba? Alimai küm ka kisüng nung lanurtemji Gondha 4380 tashi sayur, saka Arogoi küm ka nung Gondha 48 dang sayuteter, koda ser kokla? Arogoi Y/D ana asema yuang aser counseller yuang saka ajakji Deobar nü asoshi dang lir, hau parnoki meranga inyaker saka reprangang, lanurtemji anogo shia anepdang nungi nükongtsütsü tashi alima school nung dang amentsü, ibaji temli sungo jemshir tutor bushia ariteptsü, aji senshia chiyungkiyonger kar home study tenzüktsü, kar party bushia aotsü, kar yi ajemdaki aotsü, kar saidaki aotsü, kar tongpur den jajatsü ta yamaji prokshitsü süra Arogo nem koba mapang anungtsütsü ? Mapang terakata anünga mali masü no ?
Arogoi Revival tulu mapang shia ayongzüker aser iba nungi lanurtemi shilem tulu agia temulung meyipba purtem jenti adoker aji onsara tongtibang, parnokiji maneni ashiakümtsü nüngdaker, saka Revival mapang ken temulung meyipba jagi kanga pelateptsü mali, kechaser ibaji tsüngsak mopung dang lir, kechiaser tsüngsak mopungji teti maoner saka ken arurbo aji süitema oa adoker. Yamaji 1976, 1977, 1978 mapangtem nungto Ao lima nung tesüngmangtsü atalok, lanur jenti mangdanger aküm, shiner aküm, aser Arogo ajak parnoki anishi, saka parnok to shinga tatem tonga menokdaktet, teraksar timba aküm. Hau ajak majung ta mashir saka lanur dak ken mopung ka süiba ajanga kongshibaji arishia menokdaktetter.

(Maneni taruba adok nung…)