Arogo tasü : Ezekiel 37:1-14

“Item teret taküm alitsü kokdima?” (Ezek. 37:3).
Ainkar Ezekiel dang Tsüngrem nübur atsünga aoba mangdang sayu. Kecha agi masü saka teret takong lenden agi parnok tia rasaa ashitsü akok. Parnok meyipa arutsü makokba jenjang tashi orr liasü. Nüburi parnok sasa ayimten, “Onok teimla samaogo!” (t.11). Tsüngremi ainkar dang asüngdang, “Item terettem taküm alitsü kokdi ma?” Pai langzü, “Kibuba, nai dang metet! Nisung tsütsü nungi tiaji tamakoktsü liasü !
Arogoji tanü tajungba masü. Idakji arogo noksa lir saka ain mali. “Parnoki temeshiba mesüka benshir saka iba tashi menangzüker” (2 Tim. 3:5). Tenüng lir saka taküm mali. Khristai Sardis nung aliba arogo arütsü, “Tenüng agi na taküm lir saka na tasü” (J. Adok 3:1). Rongsen kar saka mangdang mali (J. Adok 3:!7). Mapa lir saka temeim mali (J. Adok 2:2-4). Renloka aotsü melen idakji telemsa dang lir. Sayutsüngiri ashir, “Idakji tamajung liasü; aser temeshi alidakjia temenen liasü” (Sayu. 3:16). Vance Havneri ashir, “Asenok jangratemtsü ki kar, jangratemtsü talungtsü kar, sentep ki tajung nung mener jangratema sermon angar. Khristai arutsüba asenoki kechi metet ?”
Noksa yanglur ka dang arogo tasü noksa ka yanglutsü aser iba noksaji ngur arogo puri par asentenshitsü nüngdak ta angatettsüsa yanglutsü asüngdangang. Noksa yanglur jagi tebur tajung tenla ki ka kiküm tesatem, kishi tulu, kichiba nung aina sentsü tapu balala inoka aser prangshiba tesangwa (glittering chandelier) inoka yanglu. Kishi tulu anasaji tenla süngden tila ka, tebangji sorak zü agi yangpanger yanglu. Au, arogo kobaisa missionary yaritsü teyari meyoker iba arogoji tasü. Dr. Oswald J. Smith i(1889-1986) ashiba ama, “Sayutsüngi masüba arogoji mokonga akümtsü!”
Saka Tsüngremi arogoji mesentoker. Tasü yim süngkümi ibaji makoktsü (Mat. 16:18). Asenok shilemji Ezekieli ama maneni shintsüla (Ezekiel 37). “Tashi agi matitaki ayimtenang, jangzü ama ne ola adokang,” (Isa. 58:1). Idangji arogoji kong alitsüla shidak jenjang jagi arutsü. Ibai “army tulu ama noktaktsü” aser alimaji Khrista asoshi akoktsü (Ezek. 37:10). Alima tamajungtiba nung Arogo tajungtibaji nungdaker!
Taküm, Tangula, onok ajanga onang. Taküm aser ain agi Ne Arogo asentenshijang. O Taküm Tangula, arung, merüktetjang, onok tasen kümjang,
Aser iba mapang ajurutsüsa Ne Arogo temsüa kümdakjang! (Bassie P. Head, 1850-1936).