Arogo ya ochi inyakdak sabang ka asütsüla

~ L. Kika  Pongener.

Arogo ya alima yimten aser loktiliba tentet ka ama masü tasüngtet aser temeshi lir. Arogo lipokji reprangdangra, arogo ya alima temenen tammang tia nungi tesangwa dangi jatetbapurtem aser alima temenen sungra talenba küpok aliba tia nungi nuji dangi jatetbapurtemi akümba lokti-tentet ka lir. Anungji arogo yimsüsuba inyakyim tamentakdakji laishiba asütsüla. Arogo bangdak inyakyimji tanga alima yimten aser loktiliba inyakyim den memeyokteptsüla. Arogo bangdak inyakyim nung yimten aser tanga lokti-tentet kecha nema teka amuoka tashi mamshidaktsütsüla. Ajisuaka, iba nungji tangatettsü kaji arogoji tanga lokti-tentet kecha dena tesendaktep malia ta mangatettsüla, kechiaser mapa tajung ajak nung arogo-i lokti-tentet ajak den sentaktepa alitsü. Arogo nungjagi ochi aser shitakbaji tenzüktsüla aser arogoji ochi aser shitakba inyakdak sabang asütsüla. Arogoji loktiliba ajunga putepa, longjema alitsü aser yimjung nung sunepa alitsü asoshi yimjung apular ka asütsüla. Arogo yabo alima loktiliba tepenja, telemsa, mepetmesu aser mangatettepba ken o aser maparen kecha nunga medeni asüngteta pilaa ayutsüla.
Ajisuaka, kanga tesasatsü-ka, tanü arogotem tia reprangdangra, arogo teimba ka nung ochi mali, telongjem temeimtep mali, tarishitep, tsükchitep aser tenukmeremtep agi sunga lir. Tanü arogotem nung rongsen ketdangsuba inyakyim reprangdangra, arogo teimba ka nung ochimashi agi sunga lir. Ano arogo nung tenzüker shimba inyakyim reprangdangra, ochishir, achi-ajem nung tasüngtet, bendanga agütsüba taküm, mapa ajak nung nentak-nentaka tenzüktsüpur apia shimmer masü, saka rongsen akar, tulur, sentsü-aketer, yimso-yimlir aser arogo nung lennirtem pei sunutsü asütsüba apia shimmer. Tanü asen lima sorkar, yimten aser loktiliba ajunga ochimashi agi sunga lir. Aji oda, item ochimashi mapa aser inyakyim ajunga metongshija yanglurji arogoji asütsüla. Ajisuaka, kanga dang tesasatsü-ka, sorkar rongsen ketdangsuba nung ochimashi inyakbaji khen shidi sura, arogo-ia dena ajongshia inyakdaktsür ta ashitsü akok, kechiba sura arogo terenlok mapa ajak nung sorkar tenzüker tazüng nungi talak tashi parnok saru medeni arogo mapa kecha meinyaker.
Tanü asen Naga nunger arogotem, talisa jila tulu arogotem nung ita shia/hopta shia tershilem, temoatsü, tepela tenla etc. aruba reprangdangra lakh aikasa arur, oda küm tatem tashi nungbo crore junga arur aser crore dak tali aruba arogo karbo lir. Anungji arogo tulu-a suang, arogo tila-a suang, terenlok mapa kechi inyaktsü sentong yangludir yangluaka, pei arogo tashi asadanger, pei arogo tashi agi akoktsüba aser inyaktettsüba mapa dang inyaktsü sentong atongtsüla. Ajisuaka, tanü arogo aika nung, pei arogo tashi dak alia sentong atonga lakhsa lakh/croer-sa crore jenjang Project mekazüka yur, arogopur rongnung tuluba nungi shir tilatiba tashi (Gradewise) lemsar, khangtepa saru sarutsüba sentong atonger. Ajiser, iba nungji arogopur kari danga nunga ta sura Tsüngrem mapa anema noktaker ama nungsen iloktsütsü tsübuba agi shingaia ola madoker, saka idangji tilar kibongtembo aika kanga tim-atemer. Aji oda, arogopur itasen achirtem ajunga iba ama khangtepa saru sarubaji agütsütsü/küpdangtsü mechi, sorkar tenzüker ita sen achir ajakbo kasa masüji, ashiko karibo sorkar rongsen ketdangsuba mapa nung ochimashi aibelena inyaker agüja alitsü akok. Ano arogopur rongnung Minister & MLA kar densema alinungbo, parnok-jibo ano jenjang balaka atakteta, kechi sudir suaka ibajibo ne shilem-a ta lemzüktsür. Anungji joko Minister & MLA-ba toa pei lemzükba senji agütsütsü/küpdangtsü mechi, ashiko nübor atema terenlok mapa tongtipang kar inyaktsüba, jila aser yimtsüngtem atema terenlok mapa inyaktsü aruba ‘Fund’ kar nungiang alozüka katizüker agüja alitsüa akok.
Ano iba dak alaka, arogo sentongtem nung Minister, MLA, Commissioner, Secretary, Director etc. tongti tejaoker, tetushi tejaoker, tongti o jembir ta…Tenla tulu angutsü teimla nung jaoker, aser joko tenung jaloktsürji tongti tejaoker/tetushi tejaoker/tongti o jembir-sang toa, tenla envelope nung terabo melem-melema seper agütsütsüsa akümer. Ano iba dak alaka, tanü nübor aikati pei jenjang, pei itasen, pei aazükba den meputep sen merijang aika/lakh aika aleper tershilem, temoatsü, tepela tenla arogo nem agütsür, ajioda, item rongsenji kong nungi anguba (?) tim lenmang nungi anguba asü (?) ta kecha meshisadangi arogotemi pelaseta agizüker. Ajiser, iba sen talepji ammer arogo dak malangba tenla tulu agütsüogo…telok ajaki teka tashi agi mahdena agizükdi ta teka tashi agi mahloktsür. Mizo nunger lima nungbo Tsüngrem tenzüker karibo arogo nem iba ama memetetba lenmang nungi anguba nungi tenla sen lakh aika agütsüba magizüki meyipa agütsüba otsü lir. Aji oda, Naga nunger arogotem-ia iba amaji inyaktettsü asü meinyaktettsü (?) ta aiben shisadanger…!!! Ano tanü Aor arogotem nung balaka küm tepiyong nung deobar kar dak alaka, deobar teimba ka nung kibong shia envelope lema tenla sarur. Ashiko, arogopur kibong ajak kasa masüji karbo envelope nung tenla seper agütsütsü maka aakba agi sentepi maor-a alitsü akok. Aji oda, arogo ya arogopur kibongtem dang nungi tenla dang imlaa khangtepa saru saruba arogo masütsüla. Tanü nübortem ajaki bangküptsü amai sorkar ketdangsuba inyakyim ajunga nung ochimashi inyaker ta tetla-tetshia jembir, saka jungjunga shisadangra, sorkar mapa nung ochimashi inyakba nungji arogo-a dena lir ta ashitsüsa lir. Tanü arogotem inyakyim aser sentongtem reprangdangra, sorkar mapa nung ochimashi inyakba denji kecha tepila mali ochimashi agi sunga lir. Aji oda, Khristar arogotem nunga ochimashi inyakra, alima yimten aser tanga loktiliba nungbo koda-ka tali inyaktsü…??? Anungji arogo yabo ochi aser shitakba inyakdak sabang ka südaktsüdi.