Arogoi nübortem tangatetba melendaktsütsüla : TR Zeliang

Dimapur, October 30 (TYO) : Nagaland nung lokti renlokdaktsütsü aser asen jilatem nung terenlok bener arudaktsünüra Arogoi nübortem tangatetba melendaktsütsüla ta Nagaland Chief Minister TR Zeliang-i metetdaktsü.
Hokolbar nikongtsütsü Nagaland Baptist Churches Council nungi Sanitation Committee den senden alidang TR Zeliang-i ashiba agi, Naga nunger lokti nung tongtipangtiba sabangji Arogo lir, anungji terenlok bener arutsü aser azükarutsü atema Arogoi nübortem dang sorkar den amalitep alitsü tangatetba sayutsüla.
“Nübortem dang civic sense aser tebilemtsü khurettem tesayuba agütsütsü asoshi Arogoji sabang tajung ka lir” ta paisa shisem.
“Arogoi merükmejua alitsü atema workshop ayongzüka agitettsü aser public awareness lidaktsütsü akok. Tzüngluruwa mapang asenoki kilentzü aolen tzü abenba pipetem ajanga tangbanger aliba angur. Ibaji ajanga tzü aolen melii gari lenmangtem ang tzü agi mobangtsüsa akümer” ta chief minister-isa ashi.
State yimtiba Kohima nung Smart City sayatsü indang olen jembidang, TR Zeliang-i ashiba agi sorkari iba asoshi kanga meranga inyakdar aser linük nung trial basis nung Mezüngbuba 20 shimba rongnung Kohima dendaktsütsü atema mapa inyaker.
“Asenoki tang aliba gari lenmang ulushia meyanglutettsü anungji tang aliba yimti yanglushitsüla akümtsü. Asenoki takokba lenmang ajakleni inyaktsüla aser iba asoshi Kohima nung alirtemi haihaura kaa yariteptsüla” ta chief minister-isa ashi.
“Smart City akümtsü atema tanü putu den apet kechisarena ajak alitsüla. Asenok asoshi gari lenmang tajung, parking spaces, kilentzü aodak ser jana endokdak alitsüla. Ano külen ozüng alema maparen inyakba azüoktsü atema closed circuit TVs (CCTVs) alitsü. Iba asoshi Kohima aser Dimapur nung enokdar aser DGP-i ketdangsüa Kohima nunga CCTVs 200 shi enoktsü sentong lir” ta paisa metetdaktsü.
Nisung kari Kohima nung BRO-i mapa inyakba noktangba atema Committee züngsemtemi mepelai bilemba metetdaktsüdang Chief minister-i ashiba agi, volunteers jagi mezüng BRO ket nung sanction/work orders asüngdang nung tajungba süla.
“BRO ket nung mapa inyaktsü atema sen lemzükja mali saka state sorkari mepishiba nung ajemdaker BRO ketdangsertemi lenmang raksa alibatem yanglutsü mulunga nangzük. Anungji tang atemabo parnok ket nung sanction/work orders maliji ashishiteptsü nüngdak madoker” ta TR Zeliang-isa ashi.
Tanü senden nung NBCC Sanitation Committee züngsemtemi Chief minister dang pa parnoki küm aika Kohima merükmejua ayuba aser süngdonglidong atemba osang metetdaktsü.