Arogoi ochimashi anema raratsü !

Taoba hopta nung Dimapur Christian Fellowship (DCF) purtemi asen lima nübortem rongnung ochimashi yamai inyaktepba anema arogoi kechi inyaktsü ta asüba tebilemtsü onük benoka jembidang, arogoi ochimashi mapatem anema nokdaktsü telemtetba agibaji telemtetba shitak agiogo. Atangji, arogoi ochimashi mapatem anema raratsü telemtetba agibaji mapa talila ka inyaktsü telemtetba agiba ka masü saka arogoi ochimashi mapa anema menokdaktet mesüra meraratet mapang talangka aruba ajanga pei tim teinyaktsü mapa ka shitak tashi itta inyaktsü atema asentenshiba mapa ka asütsü. Nagaland nung ochimashi mapa inyakba ya limapurtemi inyaker masü saka arogo nungertemi inyaker. Arogo nungerremi pei mapa inyakdak ochimashi mapa inyaktsü kenyongi marendaker, kechiyong mapa meinyaki tiyazü bill aser tiyazü nisung tenüng nung anguba rongsentemji temoatsü amai asenoki züngshir. Iba ama ochimashiba rongsentemji bendena tenla ki asür aser mission mapa inyaker. Aji oda, sensakertem meyong rakzüka agiba nungi arogo dangi tenla tulu bener arur, anungji arogobo takar akümer saka arogo nunger sensaker aser tilartembo tesensakba aser timtatemba akümer. Tanü asenok sentepba tenla kibo tajung saka iba meketa alir amangba purtem tiaji temeimtsüka, shirangdanga mozü süngjang kata malitettsüba tia nung lir. Tanü arogoi ochimashi mapa anema raraba tongpang nung telemtetba tasak kar agitsüsa akümer aser item rongnung sentep sabang nungi arogo lenirtemi ochimashiba lenmang nungi bener aruba mesüra auyaba rongsen nungi Tsüngrem nem tenla magütsütsü ajangajanga ashitsüla. Atangji, asenoki tenla kidang sentep mapang tenla sen sarur meshiteta sarasademer. Iba jagi auyaba rongsen süaka Tsüngremi meshitettsüogo ta asenoki bilemtsüa akok, ibaji Tsüngrem tsüngdang dang masü saka nisungtem tsüngdanga temenünütsüka asütsü. Ibajibo tenyartem mapang Anania aser Safira nati Tsüngrem mesüshiba mesüka lir. Atangji, tenatibo tangar meyong mauya aser merakzük saka tenati Tsüngrem nem agütsütsü nangzüker magütsü. Iba tai kisüng agi tenabo asü. Aji oda, bilemdangra tanü asenoki Tsüngrem tsüngdang ochimashi inyakba tai temenen yabo Anania aser Safira nati inyakba tai temenen dang nungi kanga agia tuluba lir. Asenoki inyakba ochimashi mapa ajanga kibong karbo chiyongtsü maka kanga timtemdagi ta bilemdi, asenoki miimzüka agiba ajanga tanurtem karbo school mazüng anenogo ta asenoki bilemdi, asenoki inyakba ochimashi mapatem ajanga shiranger karbo taneptsü menguteti süogo ta asenoki bilemdi. Aji oda, asenoki ochimashi mapa inyakba ajanga nisung aika temeimtsü jenjang nung peisasa pei taküm aser kibong akümketa melitet tepetzük tia nung lir ta bilemdi. Item ajakji arogo nungertemi arogo nunger timtemdaktsüba mapatem asütsü. Iba amaji Tsüngrema mali ama arogo nungertemi ochimashi mapa inyakbaji asenok ajak atema shisabolutsüka lir. Arogo lenirtemi arogo nungertemi ochimashi mapa inyakbaji meteta dang lir saka arütsütsü melen mita-mita sanger tenüngsang agüja sarasademtsür yutsür. Ibaji kanga lendong lir. Aji oda, ochimashi mapa inyakertem arütsütsü melen parnoki nung jagi dang arogo nungertema teyari agitsü meranger. Ibayongji, tanü arogo aika nung tiyazü bill yanglua sen agizüker arogo mapa nung amshia alitsüa akok. Tanübo joko alima shisatsü aser Tsüngrem tanüla na prongla tsütsü tangatetba putu nung alir asünungji, arogo sensaker asütsüa akok saka sensak marem ochimashiba mapa aser ochimashiba teka nungi tenla magizüktsüla. Aji oda, ochimashiba mapatem nungi aruba senbo kenyongi tenla kidangi tenla agütsütsü bener taru ta shitettsüla. Asen lima nung ochimashi mapatem onsara nungji arogoi odia ochimashi mapatem tuteta sayutettsüla aser melenshitsütsüla. Aji oda, nisung masü saka Tsüngrem peladaktsütsü merangtsüla. Atangji, arogoji takartem aliba agi bener aor saka tiyazü aser ochimashi lenmang ajanga akaba purtem rongsen agi arogo taküm alibajibo tasü den kasa asütsü.