Arogotem-i koba amala asentenshi nüngdaker?

~ S. T. Yapang. Lkr. Kohima.

Küm ishika tejaklen nungi “Tsüngremi jembiba O” ta sür Imsü Jamir, Healing Prayer Center Süngkomen, Mokokchung ajanga “Ao kin Tsüngrem tenzüker ajak dang Kibuba Yisu Khristai ashir ‘Aor Tsüngrem tenzükertem ajak longjemer kü dang temenen ajak nangzükra Tanüla Temeshi ain yoktsü aser arogotem nung revival tulu yoka inyaktsü” ta iba amala o mapangshia züluba ngua arur.
Ni repranga aru nung pai ashiba ya kanga shitak ta sa bilemer, kechiyong asentenshi tuluba meshia sarasademba mesüra tanela temeshi ain jazüka sarasademba ano sarasadem balala ayonga amungba osang kakettem nung aser asen tenük agia nguogo, aji junger, saka item denji Imsü Jamiri shinüba ya balala, kechiyong pai shinüba ya Tsüngrem tenzüker tama meshiteta, taidok meshia sarasadema amungtsüla, iba sülenjiang tanelar maparenji inyaka aotsüla ta asüba ka amai angateter. Pai ashiba ama tenzükertemi taidok meshia, temenen ajak nangzüka munga lira aji junger, saka tang tashi inyakba yagibo Tsüngrem mulung machir ta angateteter, kechiyong maneni jembiba angur.
Imsü Jamir dak mulung malemer asü, odang pai ashiba ya manganür mesüra tanü arogo inyakyim den meputeper ? Aji kecha kuli nguteta mali, aser pai jembira aji inyaktsüsa taa mali, saka pai ashiba nung dang metsütsüi atalokyonga aruba angur.
Tang tesüsabubaji Tir Yimyim May 23, 2015 Olemsabang nung pai lemsatepa angur. Pa ya pa kija aser tenzüker shingaia pusema zülusemba mangur, saka pai ashiba ama asen lima nung asentenshi sentong lulaseta agiaka tejang atangba mangur, anungji pa den Tsüngremi jembiba o; koba pai mapangshia lemsateper, iba nung ya khen temulung agütsü nung ajungtsü ta nibo bilemer.